《鬧交嗰陣咁樣做 就可以氹返男友》

當女朋友激嬲男朋友,好多人都即刻會話:「好易啫,啪啪啪就冇事啦!」

咁諗實在太膚淺!我女友就研究出一個更加實用,同符合現實嘅方法,比我上次超Work嘅方法更加Work,冇一次我唔原諒佢。

引入完畢,Let’s get started.

第一步,當然又係激嬲男朋友先啦,但今次難度相對較高,因為大多數男朋友都奉行和平主義,本住「同女友鬧交冇好下場」嘅宗旨拍拖,好少話主動嬲人,多一事不如快啲拍完拖返屋企打機,所以妳嬲嘅機率係比佢嬲嘅機率高好多。

不過凡事都有例外,好簡單,妳行行下街,全程黑面唔講嘢,男友問妳:「做咩唔開心?」妳答:「關你咩事啫!」然後男朋友,都未嬲住,復而再問多次:「係唔係我搞到妳唔開心?」妳再答:「仲要我講?我畀時間你自己諗下啦!」

第二次都未夠,要第三次,佢:「我真係唔知呀,不如妳話畀我聽嬲咩啦⋯⋯」妳終於可以直線抽擊,引發世界大戰:「我嬲咩你都唔知,真係好冇用,點解其他人嘅男朋友咁好,我男朋友就咁差!!!!!!!」

PS:成件事到底嬲啲乜,妳自己都唔知。(不過唔重要)

聽到妳咁講,男友都由溫馴嘅小綿羊,變成躁底Hulk,甩開妳隻手,人哋在世界中心呼喚愛,佢就喺路中心咆哮:「我究竟做錯啲咩呀!我差?我已經好努力氹妳啦!!!」

係時候喇!氹返男朋友嘅方法終於可以大派用場。

一,如果妳平時係小鳥依人,呢個時候妳可以有幾惡得幾惡,同佢講句:「我以後都唔想見到你呀!衰人!」轉身走。

二,如果你平時已經係野蠻女友,呢個時候妳反而要小鳥依人咁,同佢講句:「算啦⋯可能係我要求太多⋯」又係轉身走。

一定二都好,男朋友好快就會追上嚟,同妳講:「唔好咁啦⋯⋯」

妳只係需要輕輕咁講一句:「哼!你講對唔住先啦!」

男朋友講完後,妳再話:「好啦,我原諒你。」

兩個人又冇事,男朋友唔再嬲,Happy Ending拖住手去食日本嘢。

咦?成件事係咪有少少古怪?點解明明係男朋友嬲,妳氹佢,最後都係佢講對唔住?

呢個永遠都係一個謎,我哋呢班男朋友永遠都唔會睇得通、睇得透,只好默默接受。

That’s our life⋯⋯

(溫馨小提示:呢個方法最多用3次,因為終有一日,當妳轉身後,男朋友唔會再追上嚟。)


莎比亞

小說、散文作家,題材以愛情為主,個人著作:《原來比單戀更寂寞》、《鬼叫我唔識拍拖》。