《拍拖最懷念嘅 一定係呢個時候》

每個女朋友,身邊都好似總係有個明明好好條件,但又唔知點解單身嘅好朋友。

pixel ad 300250

佢哋之間,成日講笑話驚冇人要,最後老咗要一齊買姑婆屋,相依為命,共渡餘生。

當我女朋友識到我之後,脫離咗姑婆行列,一直都希望呢位好朋友早日識到個好男仔。

而最近,終於有好消息。

仲令到我女朋友對拍拖有新嘅體會⋯⋯

好朋友處於熱戀期,女朋友話:「佢哋好似我哋以前咁⋯No!應該係仲Sweet過我哋以前?呀!」

哦⋯咪又係:每朝起身都傾一陣電話、去到邊就算食緊飯都拖住手、出完街送佢返屋企,喺樓下依依不捨至少半個鐘,再吻別多半個鐘先真係Bye Bye,仲要一轉身就即刻打畀對方,話好掛住你、瞓前又講一陣電話Say Good Night等等。

呢啲熟悉嘅畫面,當然令人懷念(多數係女朋友懷念),但我只能夠好似啲政府高官咁,表示遺憾,然後乜都做唔到:「我一定會徹查點解對妳冇以前咁好,成立一個專責小組,務求令我哋重捨初戀嘅甜蜜!(唔回答記者問題,轉身走)。」

我諗咗好耐,係咪我變咗呢?或者以前總係美好啲?就好似細細個睇卡通片咁,第一代總係好過之後嘅續集,所以當我同女朋友去到第三代(3週年),劇情拖拖拉拉變得有啲格硬嚟,淡而無味,分分鐘Sad Ending。諗起都Sad。

而以下,係我沉思一輪,得出嘅結論⋯又名藉口。

我一臉認真咁同女朋友講:「輕鬆啲啦~我哋依家擁有嘅已經好多。」

以前嘅甜蜜,並唔係失去咗,而係令我哋一步一步築成依家嘅平淡簡單,好似一棟摩天大廈嘅地基,我哋愈走愈上,最高層就係一生一世。

回望返地面,懷念當初走過嘅路,由零建立一切嘅努力,但感動嘅係,原來不經不覺間,我哋走得咁高,曾經喺下幾層鬧過大交,曾經喺下一層話過要分手,但依家仍然拖住手,望住窗外嘅風景,一切都輕如鴻毛,只係想捉得妳更緊。

「所以,咁辛苦行到咁高,重點係,妳冇理由話想要跳返落去㗎嘛?係咪?」

「哼,你講就叻,轉頭咪又係理都唔理下我!望住窗外嘅風景?你低頭睇住部手機咋!」

Anyway,冇以前就冇依家,冇依家就冇以前。

所以⋯下雨天咪懷念下從前,好天就梗係出去拍下拖,愛在⋯當下吧。(講出嚟有少少心虛。)


莎比亞

小說、散文作家,題材以愛情為主,個人著作:《原來比單戀更寂寞》、《鬼叫我唔識拍拖》。