《鬼叫我哋係 冇錢嘅情侶》

數數手指,自己都二十有五,話大唔大,話細唔細。

pixel ad 300250

年齡總意味住責任。當你仲係22、23,聽上去都仲有啲青春揮霍下,但一到25歲,彷彿係人生分水嶺,冇得再玩玩下。

假如28歲結婚,30歲生仔,時間就剩返3年,買唔買樓,擺唔擺酒再諗,但起碼都要儲定一筆錢。

未開始講有乜壓力,已經自動波「唉」咗一聲,其實都唔使多講,We all know that feel。

一講起年齡,一講起將來,女朋友當然比我緊張,因為歲數對女人嚟講,總係多份壓力(好似係)。

我問女朋友:「同我一齊辛唔辛苦?有冇後悔?」

點解咁問,因為我冇錢,「依家冇,將來都唔會有」,係好悲哀,但Sad But Truth。

我好清楚自己唔會變有錢佬,第一唔識投資理財,第二亦唔係生意奇才,唔會好似Mark Zuckerberg咁,「登」一聲搞咗個Facebook出嚟。第三,我連賭都唔識,買六合彩都懶。

看得見嘅將來,就係兩個人打份牛工,僅僅夠食,間中去下旅行,如果有咩大獲嘢就會一舖清晒啲積蓄。

跟住我呢啲人,將來又點會幸福呢?

但女朋友仍然好天真咁話:「冇後悔,係我揀嘅。」

呢個對答,好多男嘅問過,好多女嘅答過,但依然係有少少感動。

唔好成日單方面形容女仔托付終身偉大,放大少少嚟睇,偉大嘅係,兩個人決定呢世就同對方一齊捱,你唔知將來會有乜問題要面對,但明知實會奶下嘢,但依然一句「我願意」、「唔辛苦」、「係我揀嘅。」

記住呢一刻,咩問題都一理通馬國明,明白了計算可變簡單。

因為悲哀嘅人生,就無啦啦出現咗一個人,為你帶嚟少少無可取代嘅快樂(雖然激氣居多)。

幸福好難去量化,有錢有車有樓當然係好,但冇嘅話,咪拖住手行街,睇下海睇下日落,唔開心嗰陣,半夜原來隔離仲有個人。(雖然佢瞓到隻豬)

係好離地,但太貼地,計算太多,就唔係愛情而係生意,仲係一盤必蝕嘅生意。

買定咗,就唔好離手,輸都十指緊扣。


莎比亞

小說、散文作家,題材以愛情為主,個人著作:《原來比單戀更寂寞》、《鬼叫我唔識拍拖》。