《愛情中最大的邏輯錯誤》

有時我會怪女朋友,口口聲聲話幾愛我,咪又係發脾氣!成日話要珍惜對方,一生一世,咪又係鬧人!

「咁就嬲,唔好話愛我啦!」我會忍唔住咁講。

而通常,結果只有一個,就係令佢更加嬲。

「愛唔係大晒㗎,我都有感受!」佢會咁反駁。

呢個咁肉麻嘅「愛」字,通常只有兩個情況講出口,第一真係情到濃時,第二,就係拎嚟做擋箭牌。

我知道明明係我唔啱呀,但我覺得妳「愛」我,就要表現得與眾不同,聖人上身,任何事都體諒,任何事都包容,唔可以有自己感受。

這是愛情中最大的邏輯錯誤,「Take it for granted」,覺得被愛係理所當然,正是如此。

愛係大晒,但大前提,係要值得。一時可以偉大到命都唔要,一時又可以因為枱面上一張亂扔嘅紙巾、一時唔記得沖廁,遲到10分鐘,而嬲到飛起,憎到佢貼地。

有個鍾意種嘢嘅朋友話過,一塊地面積有限,種嘅嘢數量有限,但塊地好簡單直接,你畀夠養份佢,就回報返你,甚至一粒種子都可以變成一棵大果樹,生生不息。

愛情如是,一直苛索最後只會枯萎。

要一生一世,就要Give & TakeGive不是指物質上,而是你要求「愛」同時,亦要顯示出同等的氣度與尊重。

而對方也會很簡單直接,你花的一點點心,又會令愛變返大晒,仲會無限大。

他一時的情緒很傷人、她突然的大吵大鬧也很討厭,而在這些難堪的時候,就需要日積月累的養份,捱過冷戰的煎熬。