【簡單氹女友系列】陪女友買部電話都咁開心?

對於電子產品,女朋友係極度依賴我去幫佢,覺得男仔就一定識呢啲。

所以,佢最近部電話壞咗,要買過新一部,順理成章地都係我幫佢揀。

佢話,好鍾意我陪佢買嘢嘅感覺。

「唔使煩喇,買iPhone啦,冇咁易壞。」我提議。

「我驚唔識用呀⋯」

「用用下就識㗎啦!」

不過,女朋友只係想買部平平哋嘅iPhone SE:「其實我唔使用咁貴,有WhatsApp就得㗎喇!」

翌日,我帶女朋友去專門店,順利地買完電話,結果就出事⋯⋯

我帶咗佢去先達貼mon貼,同買保護套,沿途都見到好多平價嘅全新Iphone,心知不妙,女朋友已經先開口:「呢度買,平成一千蚊呀⋯⋯」流露住一個「你真係信唔過」嘅眼神。

我口窒窒咁話:「專門店買⋯⋯始終好啲嘅⋯⋯」惟有咁樣安慰佢。

「唉,之後唔好再食好嘢啦,要慳返呢啲錢。」

「唔好啦⋯⋯難得拍拖。」

女朋友仍然好肉赤,踏出先達門口,望住部新買嘅iPhone:「唉⋯⋯」

呢個時候,我同佢講:「呢部係最好㗎,妳信我啦,可能出面有啲更好嘅電話,但相信妳揀嘅呢部係最好,就算點,都要信自己冇揀錯。」

然後,女朋友竟然拖返住我,無啦啦覺得好甜蜜:「我揀嘅真係最好?好啦!」

「係呀,妳無揀錯。」

前一秒,佢仲埋怨緊我:「以後都係唔旨意你喇!」點知下一秒就又再戀愛大過天,女朋友嘅情緒真係好難捉摸。 

假如我比佢早一步講句:「我其實都唔想陪妳,好麻煩。」 

成件事嘅結果又會唔同晒,可能一直黑面,又可能當街世界大戰。

幽默係解決紛爭嘅最好方法,套落愛情亦適用,下次感覺到少少鬧交嘅氣息,不妨搞個爛Gag,你女朋友可能會忍唔住笑,然後嬲唔落。

(6)