【簡單溫馨系列】如果你有一個 成日喊嘅女朋友⋯⋯

女朋友係個喊包,有時我會心諗:「使唔使小小事就喊呀⋯」

最普通係睇戲睇到感動或者生離死別嘅劇情,佢會突然望過嚟我度,捉住我隻手:「你唔好死呀⋯」

而大多數,都係心情無啦啦好差,覺得生活好辛苦,要用眼淚去釋放壓力,而通常呢個時候,次次我都忍唔住問咗句:「做乜無啦啦喊啫!?」

既然係無啦啦⋯又邊會有原因,所以佢又發脾氣⋯⋯(唔好問有咩關係⋯⋯)

但後嚟,人大咗,出咗嚟做嘢,佢少喊咗好多,但我反而唔慣。

喺我眼中,我仲以為佢係小鳥依人,好多嘢都要倚賴我,郁啲就挨住我個膊頭喊。但原來佢已經好堅強,就算工作上幾辛苦,都會頂硬上,一個人解決好多生活上、職場上嘅問題。

我突然覺得,喊係一種信任,每當佢毫無保留喺我面前真情流露,我同佢之間嘅距離會好近。有時我寧願佢做返個喊包,起碼我仲知道,自己仍然可以做佢嘅倚靠。

我同佢一齊睇劇,有個男朋友死咗,佢笑住話:「咁老套㗎!」;我問佢工作上辛唔辛苦,佢只係嘆一口氣:「都無辦法啦,你又未養得起我!」;到咗坐巴士嗰陣,我已經預備好個膊頭畀佢挨,點知佢挨咗去窗嗰邊⋯佢話:「你成日郁嚟郁去,我瞓唔到呀!」

呢個時候,反而輪到我眼濕濕,好似一切都變晒,我哋之間唔再甜蜜,要同熱戀告別。

正當我以為佢已經唔再少女,欲哭無淚,看破紅塵,看透世事⋯⋯之際,有次我病咗,只係少少發燒同感冒,但佢見到我面青口唇白嘅時候,竟然又忍唔住喊,話同我一直好開心,唔想失去我,唔想冇咗依家嘅幸福生活。

「冇咗你,我唔知點算⋯⋯」

嗰一刻,我希望病耐啲。

(24)