《拍拖愈耐 除咗幸福仲會⋯⋯ 》

愛情,會令兩個人「同步」。

女朋友突然同我講,同你拍拖之後,我又大頭蝦咗,記性差咗,仲好似低能咗⋯⋯

「死啦,咁即係我同你愈嚟愈似⋯⋯」

佢口中嘅似,唔係講緊個樣,而係行為。

喺女朋友面前,我會做出好多意想唔到嘅事。例如好陶醉咁不停唱高,就算高音上唔到都盡情走音、突然露個肚腩出嚟同女朋友講:「睇下我幾肥!」;而跳舞同講小學雞嘢已經係例行公事⋯⋯

「每同你拍一次拖,智商就好似低咗少少⋯⋯」

明明我係一個好要面嘅人,喺人面前唔多出聲,一個怕羞嘅毒男,但喺女朋友面前,我可以做番自己-同一個幾歲細路無咩分別。

而女朋友亦一樣,由保持形象嘅「女神」,變到同我一樣低能。

佢會不自覺咁唱咗你成日哼嘅歌。

佢會跟咗你嘅口頭蟬。

佢會陪你一齊講啲小學雞話。

有時連我自己都接受唔到自己咁低能嘅時候,就會忍唔住問女朋友:「妳會唔會覺得我太小朋友,照顧唔到妳?」

見到街上面西裝骨骨嘅成熟男,而自己思想同街為上都好幼稚,就會覺得自己比下去。

「算啦,我慣咗⋯⋯」女朋友消極咁答。佢話唯一覺得我Man嘅時候,就係我喺IKEA買咗啲櫃,自已一手一腳砌好佢。

講起將來,講起結婚生仔,係一重大責任,唔可以再唔認真。

但如果只講兩個人相處,我哋好怕有一日,會成為一對成熟到唔會再講甜言蜜語、對生活好多不滿、放工返到屋企相對無言嘅老夫妻。

「低能」其實無傷大雅,寧願幼稚好過礙於面子,而唔能夠盡情傾心吐意、講乜做乜都得。