[KOREA] 等了太久了!傳奇男團H.O.T相隔17年重聚超感人

講起韓流IDOL,大家一定會第一時間諗起BIGBANG、SUPER JUNIOR、BTS等韓團,但你又知唔知韓國90年代最紅嘅韓流IDOL係邊個?要數稱霸韓國樂壇一定不得不提男子組合H.O.T,如果有睇韓劇《請回答1997》對佢哋都唔陌生,因為女主角就係H.O.T嘅狂粉!H.O.T成員包括文熙俊、張佑赫、Tony An、Kangta、李在元,1996年出道,但只係短短5年就解散,當時仲有唔少fans去到佢哋嘅經紀公司示威抗議添!

廣告

全員退伍後,多次傳出五人合體,但最後都係只聞樓梯響。終於!全靠人氣綜藝《無限挑戰》經過多年同成員們交涉,終於係今年嘅《六六歌3》特輯達成大家嘅心願!上個星期六,播出《六六歌3》特輯上集,一開始分別跟各成員交涉並由佢哋自行決定要否重聚,眼見成員一個個到達,直到五人合體,就算唔係粉絲嘅編輯都睇到眼濕濕(太感動啦!)

佢哋仲親自打比粉絲,通知等待已久嘅粉絲可以參加佢哋嘅《六六歌》演唱會,就連粉絲邊硬咽邊表示:「等得太耐,真係等咗好長時間,所以絲開心,同時真係好多謝你哋,就好似收到一份可以回憶嘅禮物。」17年嘅時間,當初仲係少女嘅粉絲轉眼間已成為別人嘅妻子,孩子嘅媽媽,成為老師,或是擁有自己嘅事業嘅老闆。

 

見到偶像們練習嘅片段,回憶都即刻返哂嚟!果然寶刀未老!

聽日就播出《無限挑戰-六六歌3》特輯下集,真係要拎定紙巾睇直播啊!