[KOREA] 如有雷同實屬巧合?6首同歐美歌曲相似嘅K-POP主打歌!

1.
SUNMI《Heroine》vs Cheryl Cole《Fight For This Love》

SUNMI最新嘅單曲《Heroine》chorus部分嘅主旋律聽落同Cheryl Cole嘅《Fight For This Love》有九成相似,感覺好似只係喺《Fight For This Love》嘅主旋律上面加多幾粒音,就變成咗SUNMI嘅《Heroine》。呢首歌推出幾日就引黎咗韓國網民熱烈討論,拖咗一排負責作曲嘅YG製作人TEDDY先簡單咁回應自己絕無抄襲,亦無參考《Fight For This Love》。面對住一眾網民嘅攻擊,SUNMI憑《Heroine》得到一位嘅時候都毫冇忌諱咁去多謝TEDDY,睇黎係對TEDDY有無限嘅信任同信心!

2.
MOMOLAND《BBoom BBoom》vs SEREBRO《Mi Mi Mi》

編輯覺得呢首真係不得不提,個人黎講覺得《BBoom BBoom》同《Mi Mi Mi》兩首歌無論係旋律、拍子定係所選用嘅樂器都真係好似!有人認為呢兩首歌結他嘅部分係一模一樣,但編輯聽過就覺得單單只係對比結他其實唔係太似,反而係將所有元素加埋嘅時候,就會覺得兩隻歌超級似!可能係因為類似小號嘅嗰樣樂器(編輯唔係資深音樂人唔太識係咩樂器黎。。。)音色太獨特,再加上編曲相似,令人覺得兩首歌似到好似抄咁,特別係intro嘅部分,mashup或者調轉用都唔會有違和感啊〜〜

3.
EXO《Ko Ko Bop》vs David Guetta ft. Nicki Minaj & Lil Wayne《Light My Body Up》

呢兩隻歌嘅曲風相差好遠,但係!!《Ko Ko Bop》嘅dance break同《Light My Body Up》chorus部分驟耳聽真係 一 模 一 樣 !編輯第一次聽嘅時候以為係copy and paste咁用咗係隻歌度,兩個部分用咗極相似嘅音色,而且旋律都係由高音下降去低音,令人覺得兩段音樂係一模一樣,但細心啲再聽多幾次,就會聽到兩者係拍子上係有少少出入,不過依然會覺得佢地會過唔到Turnitin(笑,大學交功課個system啊)。SM好似通常都會同原作者買版權再重編先俾藝人唱,唔知《Ko Ko Bop》有冇買呢?

4.
SEVENTEEN《Don't Wanna Cry》vs The Chainsmokers & Coldplay《Something Just Like This》

《Don't Wanna Cry》推出嘅時候因為同《Something Just Like This》太過相似引起咗一班Fans極大回嚮,兩首歌嘅編排唔同,但chorus嘅旋律超級相似!如果之前有聽過《Something Just Like This》嘅話,你絕對可以一聽《Don't Wanna Cry》就跟住一齊哼,因為一聽就已經有強烈似曾相識嘅感覺,兩隻歌chorus真係太過似。SEVENTEEN公司Pledis Entertainment之前就為呢首歌做過澄清,指《Don't Wanna Cry》完全由成WOOZI 同唱作歌手BUMZU創作,但為免對藝人造成負面壓力,而自行決定係著作權一欄上面加埋The Chainsmokers同Coldplay成員嘅名,但公司嘅做法其實只會令人覺得係間接承認咗......

5.
WINNER《Really Really》vs Ricky Martin《Vente Pa’ Ca》

呢兩首嘅相似度就相對其他幾組黎講算低,不過都同大家分享下~WINNER隊長姜昇潤只係用咗四個鐘就完成咗《Really Really》嘅作曲,節奏輕快聽落好有現代感,同有巴西嘉年華感覺嘅《Vente Pa' Ca》主要旋律有少少相似,可能係因為差唔多key(音調)嘅關係?

6.
EXID《L.I.E》vs Madonna《Bitch I'm Madonna》

《L.I.E》chorus後dance break同《Bitch I'm Madonna》chorus前嘅嗰段節奏聽落又係九成相似,無論係拍子定樂器都好相近,再加上兩首歌嘅節奏速度又差唔多,唔仔細啲聽就會覺得兩段音樂係一樣。不過有人就覺得《L.I.E》呢段beat嘅創作靈感應該係來自韓國一首好出名嘅童謠《好好藏起來》,亦有人覺得係有份作曲嘅新沙洞老虎將以前用係T-ARA《Roly-Poly》嘅一段旋律改編再加入《L.I.E》,唔知大家聽完又覺得點呢?