[LIFE] 細個必定迷過嘅動漫男角!李小狼一定係排第一♥️

1.《百變小櫻》李小狼

廣告

細細個睇《百變小櫻》就覺得小狼真係超級有型〜有人可能會覺得小櫻嘅哥哥桃矢或雪兔先係最靚仔,但對於當時仲係小學生嘅編輯黎講李小狼先至係男神!!桃矢同雪兔都係留返俾啲姐姐迷算〜小狼唔單止有校草級嘅外貌,仲喺戰鬥嘅時候出盡晒力保護小櫻,真係Man到暈〜〜但平時同小櫻多少少接觸就好易面紅,呢個反差萌真係好得意!

2.《美少女戰士》地場衛

地場衛除咗外型夠時尚又靚仔之外,個人亦好有風度禮儀,有次月野兔整曲奇失敗佢都照呑落肚,不停安慰月野兔!喺戰鬥嗰時仲會神秘變身禮服蒙面俠去幫美少女戰士,可以算係默默付出型男友啊〜

3.《守護蛋精靈》月詠幾斗

睇《守護蛋精靈》嘅時候已經初中,開始會鐘意啲比自己大少少嘅男仔嘅時候男神幾斗就出現啦!幾斗一開頭最吸引人嘅地方就係壞壞嘅感覺同充滿住神秘感,但到後來知道幾斗其實只係因為想搵返失蹤嘅親生爸爸嘅關係先會幫EASTER收集腐化嘅「心靈之蛋」,就會可憐佢同想保護佢:(佢同亞夢嘅曖昧感情真係睇到編輯心癢癢好想自己係亞夢!!

4.《唱K小魚仙》堂本海斗

擅長滑浪嘅海斗充滿住同海灘一樣嘅陽光氣息,滑浪嗰時自信嘅笑容真係殺死人~~佢為咗幫露芝亞守住美人魚嘅秘密而犧牲自己對露芝亞嘅記憶,睇到編輯超擔心佢地唔會一齊,好彩最後都成功用愛衝破晒啲難關可以happy ever after!

5.《火影忍者宇智波佐助

明明係《火影忍者》主角嘅鳴門,但因為性格實在太過小朋友,而被佐助吸晒啲女Fans!忍者界天材佐助面對唔同情況嘅時候都保持住冷靜沉穩,有咩事都可以依靠住佢,係個有膊頭有腰骨嘅真男人!

6.《哈爾移動城堡哈爾

對自己外表有份嚴重執着嘅哈爾係宮崎駿筆下數一數二嘅暖男,對蘇菲嘅寵愛完全喺眼神之中表露無遺,相信冇幾多女仔可以抵抗到哈爾嘅溫柔攻勢!

7.《會長是女僕大人》碓冰拓海

拓海簡直係完美嘅化身,靚仔、讀書叻、運動勁,仲識得捉棋同煮野食!!!最重要係除咗美咲之外,對其他女仔都係勁cool!雖然有時對美咲嘅行為有啲幼稚,但佢對其他異性嘅態度真係會令女朋友覺得超有安全感~如果編輯嘅男朋友都好似佢咁對其他女仔就好啦,超羨慕美咲!

8.《櫻桃小丸子》大野健一

論家底當然會係花輪同學,但講到外貌大野同學一定唔會輸!除左靚仔之外仲要係運動健將,你知啦運動叻嘅男仔夠晒陽光真係超級Charm,而且個人仲充滿正義感,成日為同學抱打不平,內外在都咁正嘅大野好難唔俾佢迷到嘅~~