點只神力女超人!Captain Marvel、黃蜂女之外仲個新女英雄?

唔知大家覺唔覺,無論係Marvel定DC嘅電影宇宙,都加入咗好多女英雄嘅角色,戲份唔少之餘有部分仲有獨立電影添!依加就同大家介紹下黎緊將會或有機會喺電影宇宙正式登場嘅女英雄〜

Wasp 黃蜂女

上次黃蜂女只係喺《Avengers: Infinity War》入面出現咗極短嘅時間,今次黃蜂女就同蟻俠拍住上去執行任務對付惡人(預告click here)!不過留意返今次喺《Ant-Man and the Wasp》入面嘅黃蜂女並唔係Avengers入面嘅Janet Van Dyne,而係佢囡囡Hope Pym。

第二代黃蜂女承繼咗媽媽嘅裝備,除咗擁有飛行能力之外,仲可以隨意改變自己身體大細,只要佢想可以隨時細過粒塵又或者大過間屋!佢仲可以放出生物電流,同其他昆蟲心靈感應甚至操控佢地,真係小心啲唔好得罪佢如果唔係佢call班friend黎就GG...

Captain Marvel 驚奇隊長

Captain Marvel應該係暫時最令人期待嘅女英雄!之前被一班Avengers喺電影入面輕輕提及過,而Captain Marvel嘅電影已經拍緊,佢係Marvel第一個擁有獨立電影嘅女英雄,預計會喺2019年頭正式同觀眾見面。

Captain Marvel嘅真實身份係美國空軍飛行員Carol Danvers,有次任務喺前驚奇隊長嘅故鄉克里帝國被克里人嘅宇宙能量束擊中後,得到外星人DNA嘅佢從此就擁有咗超人般嘅力量、能量投射同飛行能力。見到劇照就好想快啲有得睇,但點解Captain Marvel件衫會係綠色嘅?:(

Silk (女版蜘蛛俠)

Silk可能會少啲人知道係邊個,因為喺Marvel漫畫入面都算係個比較新嘅角色,2014年先第一次蜘蛛俠嘅漫畫入面出現,但近日有傳Sony已經籌備緊Silk嘅獨立電影!唔講唔知,其實Silk已經低調地喺蜘蛛俠嘅電影《Spider-Man: Homecoming》入面出現過〜

Silk嘅真實身份係Peter Parker嘅韓裔同學Cindy Moon,佢地兩個係畀同一隻蜘蛛咬到而各自得到超能力。Silk唔單止擁有蜘蛛俠嘅能力,仲有其他例如過目不忘、極強嘅感知能力等比蜘蛛俠更強嘅力量,仲可以感應到蜘蛛俠身陷險境再去幫手,係個超勁嘅女英雄黎!!(不過編輯其實比較期待佢同Peter Parker嘅感情線,哈哈)

Ms Marvel 驚奇女士

又Captain Marvel又Ms Marvel媽啊好亂啊!!!!或者應該咁講,現任嘅Captain Marvel係前任Ms Marvel,佢係喺前任Captain Marvel Mar-Vell死咗之後接任嘅。而現任Ms Marvel就同佢地關係其實唔大,Kamala Khan係個俾泰瑞根之霧(er..簡單啲講係一粒神石接解到水之後散發嘅霧氣)激發出超能力嘅異人族後裔,真實身分係個普通嘅巴基斯坦裔美國少女。

現任Ms Marvel雖然唔識飛行,但係就可以隨意改變自身外型同大細,身體可以好似橡膠咁隨意伸縮,除此之外亦有自癒嘅能力,不過能力會除體力消耗而消失,會成為英雄完全係因為偶像Carol Danvers(姐係Captain Marvel)同Peter Parker。如果開拍嘅話Ms Marvel會係Marvel入面第一位伊斯蘭教嘅角色,不過Ms Marvel嘅獨立電影消息相對其他少啲,想睇嘅可能要再等下啦〜