神啊求求讓我睡!解決失眠一定要試呢4招🐼

DSE同學仔聽日放榜心情係咪緊張到瞓唔着呢?不如試下下面幾個放鬆心情入睡嘅方法,抖足精神迎接放榜日!已經返緊工嘅你都啱洗㗎〜

1. 腹式呼吸法

腹式呼吸係最基本嘅放鬆方法,而且超級簡單〜以最舒服嘅姿勢瞓好,雙手放喺腹上面慢慢吸氣、呼氣,用雙手去感受腹部升起同下降。吸氣嗰陣腹部應該會脹起,而呼氣嗰時就會下降。記得速度一定要慢,咁先可以模擬瞓緊覺嗰陣嘅呼吸速度,幫助身體放鬆同進入睡眠狀態。

Image Source: havemary.com

2. 穴道按摩法

想夜晩瞓得好,日頭可以多啲按下耳仔嘅神門穴,有助清熱安神同穩定情緒〜而到臨瞓前就可以按下腳背上嘅太衝穴,幫助疏肝氣同放鬆心情,增加瞓覺時嘅穩定性,輕鬆一覺瞓天光!

Image Source: 台北市立聯合醫院

3. 間歇性肌肉放鬆法

利用重覆收緊同放鬆肌肉令大腦慢慢發出需要休息嘅信號,14個動作唔一定要做晒,可以揀幾個自己做得舒服嘅做都可以達到減壓放鬆嘅效果!編輯精選幾個可以喺床上邊瞓邊做嘅動作,想做晒全套嘅可以睇埋條片,建議可以戴住耳機一邊聽住一邊瞌埋眼做,更relax〜

(1) 用力握拳
雙手用力握拳頭,感受手掌緊繃嘅感覺,10秒後慢慢放鬆,感受肌肉放鬆嘅感覺。

(2) 雙踭內夾
將雙手手掌貼近耳仔,手踭貼手踭,感受手臂嘅緊繃,然後放鬆放返低對手,感受肌肉放鬆嘅感覺。

(3) 緊閉雙眼
用力瞌埋對眼,直到覺得對眼周圍嘅肌肉都繃緊為止,維持10秒然後慢慢放鬆,保持瞌埋眼。

(4) 緊閉雙唇
緊緊咁合埋嘴唇,令嘴唇周圍嘅肌肉繃緊,10秒後放鬆。

(5) 腹部緊縮
用力收緊腹部肌肉,感受腹部緊繃嘅感覺,再慢慢放鬆。

(6) 腳掌上揚
腳掌用力向上翹起收緊小腿肌肉,感覺小腿、腳腕同腳背嘅緊繃,10秒後慢慢放鬆。

4. ASMR影片

ASMR近年都幾熱門,就算你唔知呢個字係咩意思,你應該都有喺Youtube、Facebook、Instagram度睇過/聽過呢類型嘅片,擠暗瘡、玩鬼口水、切番梘呢啲片就係屬於ASMR類型,睇完會令人覺得治癒舒暢〜

AMSR(Autonomous Sensory Meridian Response, 自發性知覺高潮反應)其實係指唔同嘅知覺令顱內、頭皮、後背同手腳等部位受到刺激,而産生舒服放鬆嘅反應。雖然呢種現象未有科學支持同證明,但好多人睇完ASMR嘅片都會感覺到莫明嘅舒暢〜

除咗喺Facebook同Instagram常見嘅視覺類型ASMR,其實聽覺類先係ASMR嘅主流。只要喺Youtube search "ASMR"就已經可以搵到極多聽覺類ASMR,男聲女聲、唔同環境、仲有唔同模擬情境任你揀。今晩就揀個令自己最有感覺、最舒服嘅聲音好好放鬆,瞓個靚覺以最fit嘅狀態迎接聽日嘅挑戰!