[KOREA] 7012到9012!Running Man 10個笑到肚痛嘅經典時刻

唔經唔覺原來Running Man已經陪咗我地8年啦!雖然編輯冇再好似以前咁個個星期都追,但以前嘅經典爆笑位真係睇極都仲覺得好好笑,一齊重溫下面呢10個moments笑餐飽啦!!😜

廣告

EP. 214 化身魅力偶像

佢地一出場樣都未見到已經用閃令令嘅紅色珠片裙吸引大家咗注意力,見埋樣就真係不得了,係絕對有衝擊性嘅視覺「享受」😂 班男人除咗着咗條靚裙之外仲着埋黑絲同高踭鞋,戴埋假髮同智孝一齊變成女團真係超級爆笑!鐘國仲要特登谷佢手臂啲肌肉OMG...(邊度嚟有咁大隻嘅女仔🤦🏻‍♀️)

EP. 143 光洙連中生雞蛋

大家都一路見證住光洙係幾得綜藝之神嘅歡心,連續揀中生雞蛋更係可以列入李光洙綜藝傳奇事件簿嘅第一位🤷🏻‍♀️ 點會有人好似佢咁好彩,第一次拍中生雞蛋之後,第二盤又會一揀就揀中左1/20入面嗰隻生雞蛋?

EP. 1/2/5 平和GARY

編輯想Photo Zone呢個遊戲可以返返嚟RM,佢地掙崩頭個樣真係好過癮😂 究竟喺咁激烈嘅情況下Gary係點保持佢咁平穩嘅表情,仲要張張相都影到佢?(可惜不敗紀錄最後畀Nichkhun破壞咗,哈哈)

EP. 216 天台獨木橋

呢集又係一集經典,成員喺樓下見到個布置估唔到製作組會玩到咁癲!當佢地心驚膽跳咁上到天台再過埋條橋先發現,原來自己啱啱過嘅並唔係兩幢樓中間嘅嗰條橋,而只係天台內所搭嘅一條橋仔,被玩到即時反晒白眼又哭笑不得😂

EP. 250 鐘國被剝光豬

光洙成日都偷偷地反擊金鐘國,今次仲玩得超大除佢底底,加埋劉在錫扯爛鐘國件衫,完全被剝光豬嘅鐘國只可以匿喺水入面摭住😂 之後在錫仲要「好心」咁幫佢晾條底底喺收音咪上面曬乾...😂😂😂

EP. 518 智孝完美化身無面男

智孝不嬲冇女演員包伏大家都知,素顔、披頭散髮上鏡完全難佢唔到,但估唔到佢會冇包伏到畫全耐扮無面男都OK no problem〜果然智孝內外都係女神!💕

EP. 118 GARY唔想被捉而放棄救光洙

RM成員見親大前輩崔民秀都驚到唔敢對抗佢,為咗可以繼續玩落去崔民秀嘅任何指令都會照做!(雖然聽話但最後都難逃一劫LOL) Gary聽到光洙叫救命就跑去想救佢,點知見到崔民秀嘅留言就即刻唔救仲要補多刀😂😂

EP. 205 哈哈狂奔洗手間

哈哈人有三急幾經辛苦先逃離間屋仔,點知大家掛住傾計搞到佢做唔到任務而爆發😂 之後極乾淨利落咁打爛晒三個瓢,就直奔廁所,完全睇得出佢有幾急!!

EP. 140 受憤怒病毒感染嘅光洙

被憤努病毒感染嘅人無論做咩都只會覺得好嬲,所以東萬FD變身測試人員,用各種方法去試驗已經被病毒感染嘅光洙,睇下呢種病毒係咪真係會令人只有憤努嘅情緒〜

EP. 136 冇發揮過作用嘅王鼻POWER

池石鎮好難得先喺哈哈手中拎到把金劍,可以用特別嘅能力去淘汰其他人,點知佢一味掛住玩都用過佢嘅能力,就喺佢騎緊牛嘅時候畀李棟旭撕咗名牌,成個輝煌嘅時間只係有3分鐘🤷🏻‍♀️