食住瘦!10樣「負卡路里」食物越食越瘦!

明明已經好畀心機做運動,點解都仲係瘦唔到架😭 有冇諗過可能係食野食得唔啱呢?〜除咗有規律咁運動之外飲食配合都好重要!少油、少調味料,食得清係基本,但有啲食物堪稱係「負卡路里」,可以食住瘦!😳 所謂「負卡路里」食物其實係指進食到消化過程中,所消耗嘅卡路里比吸收嘅卡路里多,以達到食住瘦嘅效果〜但切記如果加咗其他調料就會增加咗卡路里,所以如果想要飲食變瘦,都係離不開清蒸、白烚... (哈哈哈)

廣告

西芹

有英國大學研究員曾喺電視節目上為主持做測試,發現佢喺食完53卡嘅西芹同53卡西芹汁嘅12個鐘後,分別用咗72卡同112卡去消化吸收,即係用多咗19同59卡,做到「負卡路里」!

西柚

每西柚只有42卡路里同7克糖,喺水果入面算低,所以好多人減肥都會食西柚代替早餐。含起豐富維他命C嘅西柚升糖指數都較低,可以協助新陳代謝系統燃脂,真係減肥必食!

苦瓜

每100克嘅苦瓜只有7.4卡路里,超級低卡〜仲含有豐富維他命A、B6、C同鉀,最重要係有高能清脂素,可以阻止身體吸收脂肪!!怕苦都要食啊,用鹽水烚就去到苦味啦〜〜〜

番石榴

100克番石榴就含有5克纖維,足足係成年人每日攝取量嘅20%!消化高纖食物唔單止消耗更多卡路里,仲會促進腸道蠕動幫助排便〜而熱量就只有68克,如果唔食最甜嘅果籽只食果肉,卡路里會更低!

西蘭花

其實唔係全部蔬菜都有大量纖維架,不過西蘭花就高纖又低卡啦〜〜每100克有2.6克纖維,而且就算白烚都唔會難食,加少少鹽已經夠,唔洗下下都食炒菜咁油嘅!

蘋果

蘋果每100克只有50卡路里,纖維有2.2克咁多,高纖令蘋果好有飽肚感,絕對可以頂到肚唔怕食完好快就餓。

番茄

茄紅素除左可以抗氧化,仲可以增加脂聯素(adiponectin)分泌,有效對抗肥胖、高血糖、高血壓、血脂異常等。但記得一定要適可而止,如果唔係食太多就會變黃面婆🤦🏻‍♀️

韭菜

韭菜仲有個名叫「洗腸草」,因為含有大量粗纖維促進腸胃蠕動,幫助身體排走垃圾之餘仲可以減少脂肪吸收。

日日要飲八杯水大家都應該由細聽到大,除咗係可以幫身體補充足夠嘅水份之外,水仲可以加速身體嘅新陳代謝率!一日要飲幾多杯水其實有數得計,「體重(KG) x 30ml / 250ml」,例如一個50KG嘅人,一日就需要「50 x 30 / 250 = 6」6杯水。每日飲足夠嘅水新陳代謝就可以加快30%,增加燃燒卡路里達至瘦身嘅效果,皮膚都會靚啲添〜

無糖綠茶

綠茶出咗名抗氧化力超強美顏飲就啱唒,但原來減肥都啱飲!綠茶含有嘅兒茶素可以加快新陳代謝幫助減肥,對腹部脂肪(姐係你個肚腩)仲特別有效,睇嚟練唔練到馬甲線就睇佢啦😛