PIXAR童星陪住我哋大!呀Boo以外你仲鍾意邊個?👶🏻

成日都討論以前啲TVB童星大個咗有幾靚有幾型,但除咗TVB童星之外仲有另類童星陪住我哋大!一班喺動畫入面唔識大嘅PIXAR童星你又記得幾多個?👶🏻

廣告

蟲蟲特工隊 豆豆

呢套動畫原來已經成20年前!!🤦🏻‍♀️ 記得嗰時最鍾意豆豆,因為同豆豆一樣生得好細粒🙈 豆豆喺電影入面因為覺得自己太細粒乜都做唔到,所以覺得自卑。但經過阿飛嘅開解之後,慢慢有勇氣去嘗試,最後發現原來自己都可以做到好多野,成為咗個有自信嘅螞蟻王國公主,同皇后家姐一齊帶領成班蟻民🐜🐜🐜🐜🐜

怪獸公司 BOO

當年阿BOO嘅一句「BOO!」萌倒咗幾多大人同細路!天真無邪嘅阿BOO唔驚毛毛同大眼仔之餘仲成日黐住佢地玩,記得嗰陣阿BOO對門被碎睇到編輯好傷心😭 好彩後來大眼仔為咗𠱁返毛毛開心而搵返全部木碎,砌返對門出嚟,毛毛同BOO先可以再見返面咋!聽到阿BOO一句「毛毛!」,即刻暖在心頭啊☺️

海底奇兵 MO仔

鴛鴦魚鰭MO仔因為同爸爸鬥氣而被人類捉走,結果要爸爸同多莉一齊去救佢🤷🏻‍♀️好彩MO仔被放入魚缸嘅時候認識咗一班好同伴一齊逃離重回大海,MO仔同爸爸先可以咁快團聚咋〜細個見到面珠脹卜卜嘅MO仔已經覺得佢好得意,行過啲養魚舖頭都會搵下有冇MO仔嘅身影😛

超人特工隊 積仔

積仔完全係近期大熱!時隔13年超人特工隊終於返嚟,今次積仔仲搶晒全家風頭,狂用佢啲超能力添啊😆 一家人一直都以為積仔係個啲超能力都冇平凡嘅BB仔,點知到等一集結尾嘅時候竟然用咗幾種超能力阻止超勁先生帶走自己!原來積仔嘅能力係畀莫札特嘅音樂激發出嚟,超能BB嘅誕生真係多得有保姆嘉莉嘅助攻,想知詳情就要睇返「積仔全攻擊」呢套短片啦〜

沖天救兵 小飛

唔係全天下嘅肥仔都姓死嘅,羅小飛呢個小童軍就係可愛肥仔嘅例子!本來因為想考「老人服務章」成為高級童軍而搵上卡叔門口,點知誤打誤撞咁同卡叔一齊踏上咗冒險之旅,過程中睇到小飛為食、活力十足之外,亦都有勇敢嘅一面。睇到小飛喺冒險過程中嘅轉變,為肥仔一族加咗好多分,擺脫晒肥仔蝦蝦霸霸嘅電影形象😎