「抖多5分鐘就開始」!5種方法拒絕「拖延症」搞亂生活!

以前讀U,拖好多日都未肯溫書,拖到最後一日,都仲要打下機、執下枱、沖下咖啡先至捨得望本書一陣〜依家返工,每個post、每篇文、每條片都拖到last moment先有動力郁手做(就好似呢篇咁,嘻),睇嚟編輯嘅「拖延症」都唔輕🤷🏻‍♀️

「拖延症」係病症?

除咗hea好耐都未開到工、做deadline fighter呢啲之外,原來夜瞓都算係「拖延症」嘅一種!其實「拖延症」喺醫學上就唔算係一種病症,但「拖延」係一種徵狀嚟。有精神科醫生就話「拖延」呢種處事方法有機會反映到唔同嘅情緒病,一種係強逼症,而另一種係專注力失調症。而中醫就覺得人做事會拖延係因為腎氣虛、脾虛,心得唔到腎供應嘅能量,人就唔會有幹勁去做嘢,選擇逃避。

「拖延症」有分類!

第一類:拼搏衝刺型
「唔到最後關頭唔夠腎上線素刺激去做!」,呢類型係要有啲壓逼感先爆發小宇宙去做嘢。

第二類:自卑逃避型
怕做出嚟同預期唔同、怕做完會畀人批評而不停逃避唔想做件事,而逃避去拖到件事唔做唔得先郁手。

第三類:選擇困難型
因為不斷猶豫,覺得方法A唔錯,但方法B又好似吸引啲,做唔到決定點去處理件事,而越拖越耐都未去做。

第四類:享樂分心型
身邊總係有好多更好玩更吸引嘅事去做,例如做做下正經嘢走咗去打機,仲要打到唔知時間,將正經事一拖再拖都未做好。

「拖延症」可以點解決?

1. 定立小目標
如果你覺得個project好多嘢做、好難做而不停拖住唔做,可以試下將成件事分拆成唔同嘅小事項,再一步一步咁將啲小事做好,做好每一件小事就可以完成個project,你會發現原來要做好件事其實冇想像中咁難。

2. 清除分心源頭
如果身邊有好多事物例如電話、玩具、擺設等等,令你唔可以專心做嘢,狠心啲將佢哋全部移離你嘅接觸同視線範圍,咁就大大減低咗畀其他嘢分心嘅機會啦!

3. 放棄完美主義
唔係叫你hea做嘅意思,而係完美其實唔存在,就算呢一刻你覺得你做得完美,可能兩日後你就會發現仲有可以做得更好嘅嘅地方,不停喺一個位上斟酌只會令你喺另外一啲位置上唔夠時間做得好。所以,以後只要追求「good enough」就好,當然有足夠時間可以追求更好〜

4. 相信自己
如果其他人將件事交畀你做即係相信你會做得到,只要畀啲信心,相信自己嘅能力同·決定,唔再猶豫不決,一諗到點做就直接開始,咁之後就會做得好順暢啦!(萬事起頭難,開咗個頭之後就自然會識做落去,編輯我話嘅😎)

「食」都幫到手!

桂圓紅棗粥可以補氣健脾、養血安神,脾氣足個人就會更有衝勁去做嘢!但體質燥熱或者有便秘嘅人就唔啱食呢隻粥啦〜想知更多食療方法不妨去直接問下中醫師!

桂圓紅棗粥
材料:乾桂圓肉15克,红棗5粒,粳米100克,海鹽適量。
做法:將所有材料洗淨,放入鍋中,加適量清水,熬煮成粥后,入適量海鹽調味即可。
服法:每日1次,連服3日。