[EATGIRL] 旺角隱藏雞油飯超好食!「十三姨」嘅香港x印尼秘湯煮四蔬無味精又健康

識搵一定係喺橫街窄巷搵好食嘅好西!今次編輯就搵到間好嘢要開心share畀大家,各位EATGIRL有口福了🤤🤤🤤 「十三姨」就隱藏喺旺角嘅橫街入面,佢哋嘅食材每日新鮮運到唔會留過夜〜而招牌湯麵嘅湯底係由老板娘之一Tina,婆婆嘅婆婆(姐係高外祖母)流傳落嚟,湯底係由師傳每朝6點返舖頭煮,完全係超有誠意嘅心機菜嚟啊!

廣告

祖傳湯底 - 十三么(配麵)

十三飛故名思義當然係指有十三種配料喺入面!一個鐵入面有齊炙燒手撕雞、炙燒雞叉燒、粉絲、米粉、甜豉油、青葱、炸乾蔥、腸粉、椰菜、芽菜、糖心蛋、檸檬同埋十三姨祖傳雞湯十三樣食材,帶俾你十三種唔同嘅口感〜雞湯清一啲都唔膩,味道啖一啲幾適合女仔口味!

祖傳湯底 - 十三飛 (配四蔬)

而十三飛就有安格斯肩胛肉、加拿大牛肋條、粉絲、米粉、芫茜、芽菜、炸乾蔥、腸粉、椰菜、芹菜、糖心蛋、青檸同埋十三姨祖傳牛湯〜唔想食澱粉質嘅話可以好似編輯咁轉配四蔬,多菜少肉冇澱粉,感覺好似冇咁heavy!另外祖傳牛骨湯味道濃郁,大家食完麵記得飲多幾啖🤤

最佳配角 - 手撕雞拌雞油飯

編輯部一致強力推薦!!!實在太出色太香太好食!就連平日唔太鐘意食雞嘅編輯都忍唔住不停想食多幾啖🤤 聽老板娘講原來當初做呢個雞油飯係唔想浪費煲雞湯嗰時煲出嚟嘅雞油,所以參考Partner家鄉(即係台灣)嘅雞油飯,創作咗十三姨版本嘅雞油飯。無心插柳嘅創作,結果仲比招牌湯麵更受歡迎😂

手撕雞真係用手撕架〜姐姐一個人一對手密密撕,每條雞絲粗幼都平均,唔係隨便求奇撕咗就算架!雞油飯咁受歡迎真係辛苦姐姐日日撕啦🤣 BTW雞油飯賣晒就冇,要食襯早!!!

特色餐前小菜

你問「十三姨」算係賣咩菜式,um,老板娘就話佢自己都唔知道,有台灣、印尼、日本、中國...好多種元素,所以就叫佢做香港菜啦,似香港咁係個文化溶爐嘛〜佢哋啲前盤都好得意好fusion架,編輯最鍾意木耳豆角咸蛋,佢啲咸蛋唔係一粒粒咁樣,而係做到沙律醬咁淋上面,令豆角同木耳沾上咸蛋嘅咸香,好味!

前:木耳豆角咸蛋 | 後:涼拌蔬菜

花雕啫哩番茄都幾創新,番茄冇平時生番茄嗰種青青哋、好生嘅味道,再配上花雕酒做成嘅啫哩,無論係口感定味道都係第二度食唔到!而茭荀好少地方有得食,咬落爽口,加上微微嘅吞拿魚沙律醬,係個幾清新嘅選擇嚟〜

花雕啫哩番茄
茭荀吞拿魚沙律

十三姨
地址:旺角通菜街1M-1T號華發大廈地下C號舖
營業時間:12:00 - 17:00, 18:00 - 22:30