唔想去完旅行就冇Friend做?6大「好旅伴」特質你有幾多個!

啲人成日話去完一齊去完旅行都仲做到朋友嘅先係真朋友,因為可以互相幫助包容對方咁完成全個trip! 其實只要有心,要做個朋友嘅「好旅伴」絕對唔難,6大特質睇你有幾多個?🤔

廣告

1. 會plan行程

有種旅行方式係隨遇而安,每日行到邊就玩到邊,唔會plan定行程去限制自己,呢類型嘅人唔多唔少都有啲「懶惰」嘅基因🙈 懶絕對係人嘅天性,如果有人可以幫我哋安排好晒一切,但又唔係跟團冇自由,嗰個人一定係天使嚟!所以有個肯幫手plan行程嘅朋友確係好啊~

2. 話無所謂就真係無所謂

有種人好麻煩,又懶唔想plan行程,人哋plan嗰時就話玩乜去邊都冇所謂,但去到當地又話呢樣唔鍾意、嗰樣唔啱食,所謂嘅冇所謂其實好有所謂😑 喂大佬啊問你嗰陣又唔表態,到玩嗰陣又嫌三嫌四,你以為你係皇帝,要啲臣子估心意🙄 所以如果想懶唔plan行程,咁就請你唔好挑剔朋友精心安排嘅schedule,尊重朋友嘅付出!

3. 唔會行幾步就嗌攰要抖/怕曬怕攰

呢個世代養左好多溫室小花,熱少少又頂唔順,行耐啲啲又話攰。講真去旅行話晒買咗張咁貴嘅機票,梗係想去多啲地方,睇多啲人地嘅文化、特色,唔通日日都只係喺酒店附近玩下就算咩🙄 去旅行其實都唔係100%享受人生歎世界架~編輯覺得去旅行其實係另類嘅「捱世界」嚟,因為去旅行每日都用好多精力,每晚返到酒店都瞓到🐷咁〜

4. 識得睇地圖

雖然依加啲電話有晒地圖同GPS,但總係有路痴朋友望住粒藍色波波都唔識行,而中學學嗰啲地理又已經還返晒畀老師,所以識得睇地圖都係「好旅伴」嘅特質之一!識得睇地圖嘅就算有咩事盪失路,而又冇網絡嘅時候,一搵啲遊客到地圖或者問下人,都可以安全搵到路返酒店嘛〜

5. 唔斤斤計較

有啲人好鍾意連一毫子都計到清清楚楚,就連同朋友、屋企人食飯都係咁,其實就會令人覺得有啲過火,計數計到掃晒興🤦🏻‍♀️雖然係「數還數,路還路」,一蚊幾毫又唔係咩大錢,唔洗話次次都算到盡掃晒大家興嘅~今次畀多咗少少,相信係朋友都會識做下餐佢畀返多少少嘅😎

6. 同同伴有相同興趣

如果同一齊旅行有相同興趣絕對係件好事,因為對相同嘅事物有興趣,plan行程就會輕鬆好多而又減低嗌交嘅機會~一齊享受個「志同道合」嘅旅程,keep住好嘅心情,維持好嘅玩樂氣氛,就算遇到唔同嘅突發事件都可以正面彈性咁面對,或者會成為意想不到嘅美好回憶〜