[LIFE] 神劇《黑鏡》都係參考佢?日本《世界奇妙物語》系列又驚又溫情最經典!

近幾年好多人都迷上咗《黑鏡》系列,編劇筆下各種令人無語嘅幻想世界,其實只係將現實世界嘅奇怪現像放大畀觀眾睇。不過,其實日本早喺90年代起就有類似嘅劇集!!《世界奇妙物語》呢個系列你有冇睇過?(注意下面劇透〜)

廣告

2009年秋季特別篇 - 自殺者回收法

被國家認定為因無謂理由選擇自殺嘅人,會被國家救返同回收,利用自殺者去執行一啲危險性極高,例如捐出全身嘅器官、試驗新藥嘅效力、取替被劫匪挾持嘅人質等嘅任務,用佢哋想放棄嘅生命造福其他人。

觀眾對呢集有好多種唔同嘅解讀,最多人覺得係講緊生命嘅可貴,但有人覺得係講人有權去決定自己嘅生死,就算自殺都唔等於可以畀條命其他人任用,亦有人覺得係講世界係畀班聰明人玩晒,唔聰明嘅人只係可以畀佢哋控制同利用。編輯就覺得偶到唔順利嘅時刻不如搵人好好傾下,幫手分擔下心情又好、諗下解決方法又好,因為過咗呢一關之後仲有好多其他人生嘅好事等緊你,唔應該因為只佔生命小部分嘅痛放棄以後其他嘅美好人、事、物。

1999年秋季特別篇 - 選擇錯誤的男人

主角志村係個做乜選擇都會揀到唔好運嗰一邊嘅人,例如排隊買飛會揀正慢啲嗰條隊、搭𨋢會揀正逼啲嗰一部,就連老細畀晒提示佢個客鍾意啲咩叫佢去買嘢討好個客都會揀錯,搞到自己零業績事業一敗塗地。後來聽女朋友嘅建議去揀同自己意願相反嘅選擇後,人生竟然一帆風顺,事業更創到高峰成為咗公司嘅副社長。到最後忍受唔住決定忠於自己嘅選擇,結果失去晒之前累積返嚟嘅嘢。

人生每一刻都充滿住選擇,揀食乜、揀做啲乜、揀邊間學校...全部都係要去做選擇,如果要強逼自己違背意願去選擇咁過人生,咁人生仲有咩意義,唔可以依自己意思去選擇過自己嘅人生,又點會真正過得開心?

2016年春之特別篇 - 美人稅

因為國家財政緊張決定徵收美人稅去重振庫房,由政府評鑑去決定女性要交幾多嘅美人稅。屬於藝人級別美貌嘅女主角要交20%美人稅,經過一番努力更成為要交30%稅嘅頂級美女,但都因為要交過多嘅稅而令佢入不敷支,繼而決定扮醜逃稅,結果被執法人員拉咗去坐監。到刑滿出獄嘅時候發現自己因為唔再屬於時代定義嘅「美人」,唔洗再交美人稅而崩潰。

其實編輯覺得靚就真係唔只有單一嘅標準咁狹窄嘅,唔洗去盲目追隨呢個時代嘅眼大、鼻高、V面,因為你永遠唔知「靚嘅標準」幾時會變,下次變嘅時候係唔係又要整容?既然標準會不停改變,不如保留住父母傳畀我哋嘅五官、留住自己嘅個人特色咪仲好〜

另外編輯都推薦2012年嘅《拼桌戀人》同2005年嘅《美女罐》,有興趣睇埋其他喺Youtube搵一搵就有啦〜