同事間拍拖前諗清楚!辦公室戀愛唔係人人都接受到💑

睇《愛回家》見到大小姐同送水輝千辛萬苦終於可以一齊,真係戥佢哋開心啊〜佢哋呢對辦公室地下情睇到我哋班觀眾津津樂道,但現實中嘅辦公室戀愛又會係點架呢〜有好有唔好,自己衡量下!

好處#1 可以日日見

對於黐身又或者係熱戀期嘅情侶嚟講呢個一定係最正嘅好處!返工、放lunch、收工、食晚飯一整日都可以黐埋一齊見到對方,絕對係件好幸福嘅事💕

好處#2 有個人一定會撐/幫自己

有時喺公司難免會同同事有意見分歧,如果男/女朋友係同事嘅話就可以有個人撐自己(前題當然係你嘅睇法make sense,又或者你兩個好同聲同氣咁唔make sense)!同埋如果係一啲要追數嘅工種,有個月唔好彩差啲先夠數都可以有個人幫手照住嘛〜

好處#3 OT都唔怕見唔到

香港打工仔OT問題嚴重就大家都知,究竟每日有幾多情侶嘅拍拖時間係因為OT而犧牲咗?不過如果同另一伴一齊OT嘅話就唔怕會因為OT而冇得見,只係個拍拖活動變咗喺公司一齊辦公姐...

壞處#1 日日都要見

係啊你冇睇錯啊〜可以日日都見對一啲情侶嚟講係好處,但對需要多啲私人空間嘅情侶嚟講就未必係件好事!一星期返五日工,每日八至九個鐘,如果同居埋仲勁,兩個人嘅生活完全重疊晒,真係一啲獨立嘅時間都冇。吊頸都要抖下氣,一日廿四小時都畀男/女朋友𥄫實其實都好攰🤢

壞處#2 受盡同事注視

如果係辦公室公開戀愛關系,同事見到你嘅時候就會好自然咁諗起你另一半,另一半唔喺位嘅時候又會個個都走嚟問你佢去咗邊,總之就係不停喺你面前提起佢,有關佢嘅事就會問你。其實心入面好想講句「你估佢去廁所都會次次話我知咩,你直接問返佢本人啦好嘛?」🤦🏻‍♀️

壞處#3 因為公事傷感情

好喇好喇,就算對方點撐你都會有你哋自己意見不合嘅時候嘅。因為公事令情侶之間多多少少都有啲利益衝突,增加咗嗌交嘅風險啊🤧