[LOVE] 識揀一定揀麻甩女友!同女漢子拍拖嘅5個好處

自懂性以來都會覺得男仔總係會鐘意啲長髮大眼、講野好溫柔帶點嗲氣、斯文得嚟又會撒吓嬌嘅女仔,一啲好爽直、大癲大肺、我行我素、粗口照講機照打嘅女生好易比異性friendzone咗變成「好兄弟」,但其實真性情嘅女仔無機心又易相處,爽朗得嚟夠獨立,呢類「麻甩女漢子」型女仔先最正,男生們識揀一定揀麻甩系女生呀!麻甩系女漢子們亦都唔好自卑,做返自己永遠係最吸引㗎!

廣告

獨立自主

女漢子獨立能力好高,習慣自己照顧自己,能力範圍內做到嘅野唔需要叫人代勞,水自己換,袋自己拎,錢自己俾,絕對唔需要男生費心。佢地唔會好痴身,因為女漢子唔會係「拍拖大過天」,會專注自己嘅工作,有自己嘅朋友圈子同消閒娛樂,會自己處理生活上既細節,唔洗你下下要男生幫好似湊女咁。

志趣相投

行山怕曬黑,做運動又怕出汗,次次拍拖都行商場睇戲坐cafe對唔少男仔嚟講都會好悶。女漢子好多本身都好sporty,行山打波水上活動完全難唔到佢地,唔怕曬黑亦唔怕溶妝,就算去露營都唔可以照顧到自己。仲有唔會阻止男朋友睇波(因為自己都鐘意睇),可以一齊討論多啲話題!睇而且男仔打機又唔會呻無時間陪佢地,唔止可以一齊打,分分鐘可以carry你㖭呀!

爽直(有話直說)

男仔最怕女仔口不對心,女漢子有嗰句講嗰句,唔會成日要人估佢諗緊乜或嬲緊乜。而且唔會耍心機,亦唔鐘意轉彎抹角,有咩都唔會收埋係隱瞞住你。加上性格爽直,好多野都唔會計較,好有義氣,對所有人都係拎個心出嚟交往,所以人緣好好!有情有義又會為男朋友著想,更加唔會扭扭檸檸。

不拘小節

女漢子食野從來都唔會介意環境,填飽個肚就得,唔會下下要你比錢食貴野,無論係食大排檔定係掃街都係佢地最愛!唔洗下下諗到2046都未傾掂食咩,會有主見地提議一齊去食個沙牛通。又唔洗相機食先,影成百張相等到啲熱辣辣嘅食物變晒化石都未食得。重點係女漢子唔會奉旨叫男仔請,會AA自己俾返自己嗰份。

只求舒適

男仔最怕等成個鐘都未等到女仔化好妝出門口,女漢子分分鐘15分鐘就可以出發,佢地唔係不修篇幅,只係唔姿整求舒服,處理好基本儀容就okay。著衫又會以casual為主,男生們又唔洗怕佢地走光!而且佢地唔會盲目跟風去網紅cafe或景點影美照呃like,覺得放假hea喺屋企先最正,男生們就唔係諗節目諗到頭痕又要做私人攝影師啦!