[BEAUTY] 平嘢有好嘢!小資女要試嘅$12店尋寶推介

近年好多人都鐘意去$12店尋寶,比啲心機慢慢搵就會發現好多樣子平凡但其實好好用嘅野,唔少仲要係”Made in Japan”㖭㗎!但有啲人會因為覺得產品定價太平而覺得可能麻麻地好用,所以唔敢買嚟試,但其實有啲性價比超高嘅好物值得小資女入手,有時朋友見我用嘅時候都唔信佢係嚟自$12店㗎!一齊睇下有咩好物推介啦🤓

廣告

1. 洗掃液

性價比:★★★★☆

$12店嘅洗洗掃水一直都好受歡迎,唔傷掃又洗得乾淨,價錢又平!只要將清潔液滴3-4滴落掃頭同器皿,然後捽走掃頭嘅化妝品,再將污糟嘅掃浸一水,啲粉就會浸晒出嚟,之後過清水就可以啦!唯一缺點係容量較少,好快就會用晒,不過始終大牌子嘅洗掃水價錢太貴每次洗都唔敢落咁多會就住就住,但呢支價錢咁抵就落多幾滴都唔怕啦!

2. 面膜紙 + 化妝水套裝

性價比:★★★☆☆

呢set真係超抵買!一pack10張面膜紙都係$12,加埋同樣係$12嘅保濕化妝水,姐係$24就可以敷到10次!當然保濕效果一定唔會有$20一塊嗰啲咁好,但如果純粹想個妝貼啲化妝前敷絕對okay,基本保濕功能夠用,而且細細粒易攜帶,拎去旅行一流。

3. 腳膜 + 保濕襪

性價比:★★★★☆

面膜就敷得多,但應該好少會幫對腳敷mask,所以不妨試下呢對腳膜,佢係袋型設計,可以成對腳放入去,仲好貼心地有膠紙黐住腳口位,等你敷緊嘅時候都可以周圍走。敷20分鐘就可以啦!敷完皮膚明顯有滑到,仲可以甩埋啲死皮㖭!敷完即刻著返對保濕襪,佢個腳踭位有個特別設計可以幫我地留住水份,腳踭滑dodo著高踭鞋都靚啲。

4. 穴位貼紙

性價比:★★☆☆☆

每包有10塊貼,每個貼都有一顆小釘子,包裝上亦有穴位圖跟著貼勁得意!貼後好似無咩感覺,大家可以用手輕輕按壓穴位,等多一陣就會有感情了!穴位貼紙當然沒有人手按摩嘅效果,但少少酸痛例如打得字多手掌酸痛,貼一貼就好有用。