[女生打機團] 人氣鬼捉人Game《第五人格》玩咗未?公開只有1%成功觸發嘅彩蛋!

PUBG熱潮過咗之後,依家最Hit嘅手機Game一定係Identity V (第五人格)!呢隻「非對稱對抗遊戲」玩法簡單容易上手,無論細路定大人都可以一齊玩,同friend一齊玩就更加過癮〜

廣告

遊戲劇情係講主角「我」係個失咗憶嘅潦倒偵探,接受咗巨額嘅奇怪委托而去歐利蒂絲莊園進行調查,幫神秘嘅委託人搵返失蹤嘅囡囡。除咗畫面設計同背景音樂營造咗個好好嘅遊戲氣氛之外,情節同角色都有唔少細節,唔知你哋又留唔留意到?

原來「我」一直被監視?

喺大廳右邊有對畀木板封起咗嘅門,如果企喺門前面太概兩、三分鐘左右,門會自己打開再閂埋。如果再等耐啲,對門會再打開,不過就會多咗對眼望住你......

聖母像有古怪?

聖心醫院地圖中間有個好大嘅聖母像,當你進入咗佢嘅視線范圍,佢就會一直望住你,你圍住佢跑佢個頭就會跟住你轉!(編輯想知如果全部人一齊圍住聖母像跑會發生咩事,有冇人可以試下🤩)

手術台上有人影?

又係聖心醫院!不過今次係手術台有彩蛋,喺遠處行過去手術台唔會太明顯,但行近就會發現手術台上有個越嚟越明顯嘅人影!有咁大個印喺度真係想像唔地台上面嘅人曾經經歷咗啲咩事......

這不是地窖?

地窖喺一般情況下其實冇任何作用,但到淨返最後一個求生者嘅時候,就可以利用地窖去逃脫。不過有個得意嘅位置,有個好似地窖嘅位置上面放咗塊好似係用血嚟寫「這不是地窖」嘅白布,隔離仲放咗白色蠟燭,感覺就好似之前有求生者想喺度逃脫但發現原來唔係地窖,而留低畀其他求生者嘅Dying Message!

厰長被人體改造過?

軍工厰嘅地下室入面有一張「人體改造」嘅計劃圖,而圖上嘅人形就同厰長嘅體形吻合,所以厰長應該再唔係一個普通嘅人類...... 睇圖應該係改造咗對手?

點解求生者對眼會係衫鈕嚟?

劇情講過參加遊戲嘅角色都係人嚟,咁點解喺各位偵探玩嘅時候,各個角色對眼都係衫鈕嚟?其實編輯第一次見到隻Game啲角色,就即刻諗起細個睇過嘅一套動畫電影《怪誕隨意門》〜

仔細啲咁睇每一個角色,就會發現佢哋原來唔係人而係公仔嚟!各個角色除咗身上有多處有縫針位、補丁之外,仲可以喺佢哋膊頭、大脾、腳等等嘅位置上發現爆咗出嚟嘅棉花!

至於點解佢哋會係公仔而唔係人類,可能係想呼應返「迷失」嘅概念?《怪誕隨意門》入面篷上咗鈕扣眼嘅小朋友會失去靈魂,迷失喺巫婆嘅世界入面,而被監管者捉到嘅求生者就會迷失喺莊園入面,出唔返去外面嘅世界......

BTW琴日官方就開咗新嘅「雙監管者模式」,有兩個監管者同8個求生者對戰,應該會好刺激,不過好似暫時只係大陸版有得玩?:(