[LIFE] 80歲吃播網紅、95歲模特兒?活得比後生女精彩時髦嘅80+銀髮網紅!

有無諗過自己80歲嘅時候會做緊咩?湊孫飲茶優悠渡日?有無諗過其實越老越可以生活精彩!就算年紀大都仲有好多嘢可以試㗎,有幾個婆婆8、90歲先「出道」成為網紅,着起靚衫入型入格,影起相上嚟仲比後生仔更有味道同鬼馬,打破好多人對長者嘅固有形象,生活比後生仔更多姿多彩㖭!正所謂家有一老如有一寶,邊個話淨係年輕貌美嘅女仔先可以做KOL同MODEL?

彭瑞瑛 Alice Pang (香港)

而家似乎好難會見到年過80嘅婆婆著裙,但95歲嘅Alice 93歲先「出道」做銀髮模特兒,佢最愛就係著one piece裙。Alice氣質獨特優雅,眼神和一舉一動同專業模特兒無異,令人驚艷!望住佢啲相唔會覺得佢已達95歲,仲會覺得佢好吸引㖭!丈夫過身之後令一向好動愛搞扮嘅Alice變得內向,孫女就同「老正工作室」聯絡,幫助婆婆成為模特兒,搵返佢嘅人生樂趣!時尚無分年紀,無論幾多歲嘅女性都有獨特美態㗎!

金英媛(韓國)

[email protected]_tv

呢位80歲嘅韓國婆婆叫金英媛,靠韓國時下最流行嘅「吃播」紅起來,淨係直播自己食野嘅過程已經成功吸引近16萬粉絲。婆婆每次都會食得津津有味,雖然緩慢但認真,好多人都話見到金婆婆吃播,就好似見住自己親人食飯一樣親切。金婆婆亦會放好多日常生活照上IG,見佢表情影相豐富又鬼馬,仲會好似一般年輕人咁去汗蒸幕、敷mask、自拍,80都生活得好似20歲咁精彩!

Baddiewinkle (美國)

[email protected]

剛滿90歲嘅Baddie又名七彩婆婆,相片風格大膽又色彩繽紛,好多連後生仔女唔敢著嘅衫佢都carry得好好,毫無違和感,每張相嘅背景同表情動作都鋪排得好好,同一般KOL無異!睇佢IG就好似睇緊fashion show咁,亦好有美國時尚風味,令人忍唔住會不斷loop,正正因為婆婆咁有fashion sense,所以到唔少時裝品牌青睞㖭㗎!如果編輯90歲都有佢咁fit著衫咁好睇就好啦!

西本喜美子 (日本)

[email protected]_nishimoto

呢個出名「阿婆走得快」嘅日本婆婆西本喜美子已經90歲嘅佢仲好有活力,專影啲特效動感相,佢會扮飛車、扮坐飛天掃把,又會著可愛動物衫扮兔仔同青蛙、狗仔,表情又鬼馬可愛,但人睇得好開心,見到佢就好似見到自己婆婆咁親切!重點係大部分相都係自攝作品,佢72歲先學攝影, 74歲學Mac,真正活到老,學到老!呢位「攝影界新星」好受歡迎,仲推出過相集,真係有創意過後生仔呀!