[LIFE] 開學必遇5種人!你又屬於邊種?

話咁快暑假就完咗又到開學日!當年睇到9月1號係星期六嘅話就會即刻覺得賺咗,好似唔洗返咁多日學咁~(其實咪會遲返2日先放嚟緊個暑假,所以冇分別😂) 編輯以前每年開學都一定未做晒啲暑期功課,你哋又有冇試過可以準時交到暑期功課?冇嘅話你應該都係同我一樣係開學抄功課型嘅同學仔😛

廣告

1. i'm ready學霸型

頭梳好,校服燙好,暑期功課做好,超精神咁坐喺課室等上堂,第一日可以做好晒準備、咁精靈咁等上堂,除咗學霸之外應該冇乜人做到。

2. copy and paste抄功課型

暑期功課係咩嚟?食得架?放暑假梗係去玩,唔通真係做啲老師都唔會認真睇嘅暑期功課咩,前一晚做到幾多咪幾多,做唔晒咪返嚟抄,抄唔切咪拖個星先交😌

3. let me sleep未瞓醒型

通常第一日入課室都見到好多條「屍」趴咗喺枱面〜講真暑假晚晩打機煲劇到半夜先瞓,朝朝冇11、12點都唔起身,突然要6點起身返學真係好攰,上堂前畀我瞌多陣啦好嘛?

4. in coma昏迷遲到型

未瞓醒嗰啲都仲聽到鬧鐘識醒返到學校先補眠,有種人昏迷到唔識醒以為自己仲放緊假,醒嗰下已經過咗學校打鐘時間,再施施然咁搭車返學〜遲到又如何🤙🏻

5. still my holiday犯晒校規型

有唔少同學都會襯暑假染下頭髮型下靚下咁,準備開學就話染返黑,但唔知點解拖下拖下到開學嗰日都未染,結果咪一開學就畀prefect捉囉。