[KOREA] 迎接少時新分隊「Oh!GG」!4件少女時代戀愛、不和的小道傳聞

唔經唔覺原來少時已經出道11年,喺有成員離開公司嘅情況下SM決定由續約嘅成員組成新分隊「Oh!GG」繼續打拼,如果想要完整體應該要等多一段幾長嘅時間先會睇到啦〜咁多年嚟咁多個女仔一齊又點會冇是非八掛?今次編輯就集合咗幾條過往幾突出嘅小道消息同大家回顧下,純粹娛樂分享,大家唔好太認真對待小道消息喔〜

廣告

1. TaeTiSeo之外仲有其他計劃分隊

少時出道11年嚟都只係推出過TaeTiSeo一隊分隊咁多,唔似Super Junior或者現時主流咁不定時推出唔同分隊去吸金〜2012年TaeTiSeo出道前就有傳少時會3人一組咁出3個分隊,分別係TWINKLE - 太妍、Tiffany、徐賢,TRIPLETS - 潤娥、Yuri、秀英,同埋TROUBLE - Jessica、Sunny、孝淵。

但最後就只係得太妍、Tiffany同徐賢嘅分隊,同依家繼續留喺SM嘅成員組成嘅Oh!GG出道,嚟緊又係少時掃榜嘅時侯啦,Sone們加油〜〜

2. Yuri曾同時被孫藝珍&韓藝瑟追求

2011年《首爾體育報》用A、B、C代名爆出3個女藝人嘅「愛情爭奪戰」,A同B係有名嘅女演員,而佢哋同時對一線女偶像C展開熱烈嘅追求,有傳3個女藝人分別係孫藝珍、韓藝瑟同少時嘅Yuri。Yuri面對兩位演員前輩嘅各種攻勢,介紹導演佢認識、送車、甚至飛去外地睇佢演唱會等等都唔識得拒絕而令紀理人好頭痛!呢條小道都幾出名架,不過就從來都未有人證實過〜

3. Jessica本來有個美麗嘅別離

當年「Jessica被退團」嘅羅生門應該連非韓飯都略知一二,當時公司就指係Jessica因為無法兼顧個人事業同團體演藝事業而退出少時,但Jessica就喺社交網站度發聲明指自己係被公司同另外8位成員通知自己再唔係少時成員,令退團事件嘅真相走入迷宮。

D社後來向知情人事攞料,指Jessica想走係真嘅,只係冇預計會突然被除名,而另外8位成員想Jessica走就係事實嘅一半,佢哋係同Jessica提出「個人事業」同「團體活動」二選其一,不過公司、少時同Jessica不斷開會商討嘅時候Jessica又離開咗去處理個人事業而溝通唔到,可能就係因為咁而令公司同其他成員覺得Jessica已經唔再將少時放喺第一位亦冇誠意去協商,決定放生Jessica。

編輯記得之前睇過有條小道消息,話本來少時計劃咗喺一場演出入面同Jessica做場美麗嘅道別,點知Jessica都係等唔到嗰個時候,而令自己同公司仲有少時嘅分手做得咁醜怪,但係編輯搵咗好耐都搵唔返相關資料😭

4. 潤娥欺凌成員

話潤娥同太妍係隊入面人氣最高嘅兩位成員應該冇人會反對,但一山又點能夠藏二虎?曾經有小道消息傳過,《The Boys》宣傳時期潤娥搶晒風頭,令到太妍心有不甘,仲話潤娥喺後台用太妍嘅個人單曲掟太妍塊面!(好恐怖😨,但編輯search過下太妍喺嗰陣時應該仲未有實體嘅SOLO碟) 亦有指2009年某次live入面潤娥特登喺台上掀起Tiffany條裙,想踢爆Tiffany唔打底搏出位,仲有消息話孝淵之前有次企圖跳樓自殺係因為潤娥帶頭蝦佢......