牙黃點算好?即試明星私藏嘅牙齒美白法!

平時晚晚都好夜先捨得瞓,搞到每朝起身都唔夠精神,要靠飲咖啡奶茶嚟叉叉電先keep到個人精靈啲。但係日日至少一杯奶茶咖啡,染到啲牙黃晒唔靚,影相露齒笑就顯得啲皮膚更加黃,啲相點影都唔靚/_\ 所以除咗皮膚要美白之外,牙齒都要美白!有白雪雪嘅牙齒先至笑得最有自信,一齊睇下明星藝人係用啲咩方法去keep住啲牙又白又靚啦!

廣告

Hani - 食嘢後30分鐘刷牙

唔少韓國人喺食嘢後都有去廁所刷牙嘅習慣,但Hani嘅牙醫話,如果食完嘢即刻刷牙嘅話,食物入面嘅酸性就會刷咗入牙齒入面,破壞牙齒嘅琺瑯質,令到啲牙變黃。所以聽話嘅Hani就會喺食完嘢半個鐘之後先會去刷牙,減低對琺瑯質嘅損害

新木優子 - 刷牙前薄敷牙膏

新木優子會喺刷牙前用牙膏薄敷牙面5分鐘,防止茶同咖啡嘅色素沉澱喺牙齒,先再刷牙。記得要揀效能溫和啲嘅牙膏薄敷,如果唔係有機會破壞牙齒!

迪麗熱巴 - 用棉花棒清潔

迪麗熱巴喺用完牙刷刷牙之後會用棉花棒幫啲牙進行「二度清潔」!先用棉花棒沾啲牙膏,再喺牙縫位置不停刷,刷走牙刷未必刷到嘅牙縫細菌同污垢,令到牙齒有更全面嘅清潔,自然就更白淨啦〜〜

金裕貞 - 用「美齒濕紙巾」

童星出身嘅金裕貞會隨身帶備「美齒濕紙巾」,食完嘢之後就即刻用嚟清潔牙齒,喺形成牙積之前就將根源剷除,keep住靚靚嘅白牙!

泫雅、雪炫 - 「油潄法」

泫雅同雪炫每朝都會用天然椰子油/植物油去漱口,除咗可以美白牙齒之外,仲有助去除口腔細菌同污垢,亦有效消除口氣!「油潄法」喺歐美地歐原來好流行,喺起身之後,刷牙、喝水前,將一匙油含喺口入面 15 至 20 分鐘,然後吐返出再用淡鹽水漱口,然後先至擦牙。

編輯推介天然牙齒美白法

1. 士多啤梨+梳打粉

將8粒士多啤梨切成極小粒(甚至打成蓉),加一茶匙梳打粉自制天然美白牙膏〜梳打粉嘅碳酸氫鈉可去除牙齒污漬同牙垢,而士多啤梨就含有葉酸,有助清潔牙齒。但注意因為梳打粉嘅粒子較大容易磨蝕牙齒破壞琺琅質,所以1星期用1次已經係極限啦!

2. 香蕉皮刷牙

用香蕉皮內側捽牙齒表面,直至香蕉皮喺牙面形成膏狀物,等10至15分鐘後刷牙,就可以去除牙垢同牙漬。香蕉皮有可以被牙齒吸收嘅礦物質例如鉀、鎂、錳等,有效美白牙齒,而且仲冇腐蝕性,可以喺唔傷牙齒嘅情況下美白牙齒。

All Photos from Internet