真正童話婚禮!一生人一次結婚當然要套迪士尼公主婚紗!

女生們細細個睇完啲公主嘅卡通電影都一定會扭爸爸媽媽買條公主裙,咁樣我哋就可以着住條靚靚公主裙,同毛公仔扮嘅王子喺屋企舉行夢想中嘅婚禮〜但係點求佢哋都好始終都係唔肯買... 不過唔緊要,到依加大個我哋有經濟能力嘅時候就可以買畀自己!!各位姊妹們依家機會嚟啦,日本婚紗公司Kuraudia同迪士尼聯乘出咗以6位公主做概念,設計咗13款超夢幻嘅童話婚禮禮服💕

Belle 貝兒

係貝兒條裙啊!完美咁還原咗《美女與野獸》入面貝兒條公主裙,有咗佢就好似做咗真公主一樣☺️

如果覺得太誇張就可以揀呢條淡黃色嘅婚紗,着上身即刻氣質滿分〜

Cinderella 灰姑娘

雖然冇貝兒條裙咁「神還原」,但華麗嘅感覺同動畫一模一樣架!

灰姑娘款嘅婚紗夠晒溫柔內斂,最啱柔和系女生。

Snow White 白雪公主

白雪公主呢條紅裙啱晒敬酒嘅時候着,鍾意簡約款嘅你千祈唔好錯過!

用花圖案嘅Lace帶出森林嘅感覺,切合返白雪公主喺森林遇上有個小矮人嘅情節。

Ariel 艾莉奧

裙擺嘅藍色漸層超·級·靚!一層一層嘅裙紗好似海浪啊🌊

同樣都係以唔同長度嘅裙紗去營造海浪嘅感覺,心口嘅百摺設計就有貝殼嘅感覺。

Rapunzel 樂佩

花朵加紫粉紅充滿女生味道,係款幾浪漫嘅設計啊🌸

呢款冇傘型裙擺嘅設計更方便走動,切合樂珮自由奔放嘅性格〜

Aurora 睡公主

睡公主只有粉紅裙一個設計,但完美咁帶出咗Aurora嘅淑女氣息啊〜

除咗婚紗之外,佢哋仲有Casual Dres可以做姊妹裙,連新郎嘅Tuxedo都有!要打造童話婚禮話咁易,各位公主們可以去佢哋網站度睇睇啊😚