[LIFE] 可樂唔飲仲有用!4個神奇用途你試過未?

可樂通常唔係要嚟飲就係要嚟煮嘢食,總之都係放入口呑落肚嘅用途居多,你又估唔估到原來可樂仲有好多得意又實用嘅用處?唔可以令氧化嘅飾物重獲新生之外,仲可以用嚟洗頭令頭髮變靚添?!刻mark低呢幾個用法,就算可樂擺到冇氣都唔洗丟咗去咁浪費嘛〜〜

1. 去鏽

啲飾物戴得多就會氧化變黃變暗,想戴出街又覺得條鏈變咗黑色唔好睇☹️ 喺呢個時候可樂就係你嘅救星!只要用可樂浸住氧化咗嘅飾物約一個鐘(純銀效果最明顯,普通金屬未必有明顯效果㗎!),再用清水沖洗之後抹乾,就會有件新買一樣嘅飾物啦!可樂含有嘅磷酸可以帶走氧化銀同鏽漬,所以除咗飾物之外,屋企如果有生鏽嘅工具都可以用可樂去鏽㗎〜

2. 洗頭

通常倒瀉可樂喺樂上第一個反應係好·討·厭!一來整污糟啲衫褲,二來又搞到個身黐立立咁,但竟然有人會將可樂倒落頭度用嚟洗頭,仲要用完效果十分滿意?!唔少Beauty Blogger用完可樂洗頭之後都話覺得頭髮柔順、蓬鬆咗,有啲仲會有自然卷曲嘅效果添〜你又夠唔夠膽試下?

p.s. 如果染髮後覺得顏色太鮮或者太深,都可以用可樂洗一洗走啲顏色。

3. 去除香口膠

如果只係件衫黐到香口膠仲可以用冰整硬舊香口膠然後摵落嚟,但如果係黐咗喺頭髮上面就有冰都冇用啦,唔通真係要剪咗佢?😭 NO NEED〜只要你用倒啲可樂喺香口膠度,可樂入面嘅碳酸同磷酸會令香口膠失去黏性,慢慢捽就捽得甩仲清得好乾淨添!

4. 洗廁所

廁所有漬擦唔走,不如試下臨瞓前倒一支可樂落廁所入面,由佢浸住啲漬一晩,第二朝起身只要沖一沖廁,白淨馬桶就即刻返返嚟〜原理都係透過可樂嘅碳酸同磷酸去分解污漬,睇嚟碳酸同磷酸係家居清潔好幫手🤔