[女生打機團] Switch重製爆笑碌波遊戲《塊魂》!秋冬3隻新Game一定要同Friend玩

早幾日Switch宣布咗經典Game《塊魂》會推出Switch嘅重製版本《塊魂Encore》,一班玩《塊魂》大嘅90後已經急不及待要玩,不過就要等到冬季先有得玩啦〜除咗《塊魂Encore》之外,嚟緊秋冬仲有2隻同friend玩一流嘅Party Game會登場,超級期待啊!!😍

1. 《塊魂Encore》

淨係控制主角小王子係咁將個波碌碌下黐起地下啲雜物,碌到指定大細成為唔同嘅星球,睇落好似好簡單,但實際上幾考判斷力㗎!一嚟要碌啲啱Size嘅雜物,太大會黐唔到,太細又好似冇乜用咁,二嚟仲要控制個波嘅平衡,如果啲雜物偏向一邊咁黐個波就會唔平衡變到好難碌又碌得慢!

14年後嘅重製版《塊魂Encore》基本操作同以前PS2版分別唔大,但就多咗體感操作,可以「Chok掣」加速,亦都有HD震動功能等玩家有多重享受〜

《塊魂Encore》仲可以分割螢幕雙打,同Friend一人一邊喺限時內鬥碌到最大,一齊亂碌鬥撞一定好過癮超爆笑!

《塊魂Encore》
發售日期:2018年冬季(未有確實日期)
最多遊戲人數:2人

2. 《Super Mario Party》

Party必備Game《Super Mario Party》等多10零日就有得玩!集合多個小遊戲嘅《Mario Party》系列一直受到玩家嘅愛戴,今次推出Switch嘅版本有80隻全新嘅小遊戲,絕無重覆前作嘅遊戲,有排先玩得晒啦〜😆

《Super Mario Party》除咗可以用「雙Mon」組合嚟玩之外,仲可以用Switch手掣嘅體感功能玩多款小遊戲,可以用全身去玩小遊戲,完全有第一身嘅感覺!為咗隻Game編輯可以買部Switch!!(不過冇錢買...)

《Super Mario Party》
發售日期:2018年10月5日
最多遊戲人數:4人

3. 《任天堂明星大亂鬥

睇cover就已經感受到隻Game會好正,連官方都話Switch版嘅《任天堂明星大亂鬥》係史上最大型,因為無論係角色、道具、場景定係背景音樂,都係歷年嚟咁多隻遊戲之中最多!有多個角色、道具同場景嘅組合隻Game就可以千變萬化,玩極都玩唔厭〜

集合任天堂71個經典遊戲角色,喺100個遊戲場景入面,配以各種道具進行格鬥模式對戰,絕對係今年令玩家最期待嘅Game之一!仲有成900首背景音樂,一次過聽晒要28個鐘真係超誇張,「史上最大型」呢個名銜真係實至名歸啊!

任天堂明星大亂鬥
發售日期:2018年12月7日