[BEAUTY] 一個嘴但唇膏有好多枝? 擺咗好耐嘅唇膏原來都可以翻生!

女仔呢就總係差咁支唇膏,次次見到有新唇膏都有理由叫自己一定要買!結果得一個嘴嘅我哋,當然有好多用唔晒嘅舊唇膏🤦🏻‍♀️ 投資咗咁多錢喺佢哋身上梗係唔捨得掉咗佢哋,究竟有冇啲咩方法可以令佢哋得到第二生命?試下呢幾個用法,將佢哋用喺其他地方!

胭脂

唇膏放耐咗唔想搽上嘴怕食落肚,不如試下當做胭脂用!除咗可以就咁直接搽喺面上推開之外,仲可以用多少少材料,DIY專屬嘅胭脂膏,變成胭脂膏之後會易推啲同均匀啲㗎!😚

材料
唔再搽嘅唇膏
橄欖油
妝前乳
打亮粉底液(如果想要打亮效果)

用具
鐵匙羹
搞拌捧
蠟燭(加熱)

做法
1. 將約一支唇膏份量嘅唇膏放喺鐵匙羹上面,顏色隨喜好自己調較,再加入1/4茶匙橄欖油。
2. 將放咗唇膏同橄欖油嘅鐵匙羹放到火上面加熱溶化,記得要邊加熱邊搞匀。
3. 溶化成液體後就加入適量嘅妝前乳再搞匀,完成後倒入盒仔等冷卻就OK

眼影

呢個用法就啱唇膏液多過唇膏,不過當然用唇膏都可以!有用咗好耐都未用完嘅唇膏液就可以點少少喺眼蓋,用眼影掃或者手指去推開,慢慢造出漸變嘅效果。

畫眉

吹韓風開始就有唔少人漂染誇張嘅髮色,而紅色、粉紅色呢類就最深得女仔歡心~但髮色轉咗眉毛色都要變,如果同髮色差太遠望落就會好奇怪🤦🏻‍♀️呢個時候啲舊唇膏同唇膏液就幫到你啦!用眉掃直接畫眉又得,用普通眉筆畫好再補啲紅色上去又得,仲可以用睫毛液刷點啲唇膏液當染眉膏用添~


指甲油

呢個方法超級簡單又容易!先用個唇刷掃啲唇膏,再搽上指甲上面,最後喺面層搽返層透明指甲油就搞掂,super easy

新唇膏

買得嘅唇膏都係靚嘅色😍 唔知將呢啲顏色組溝埋會唔會有隻更靚嘅色呢?發揮創意溝出屬於自己嘅唇色,唔使錢就有支新唇膏啦!

材料
舊唇膏

用具
鐵匙羹
搞拌捧
蠟燭(加熱)

做法
1. 根據喜好將舊唇膏溝埋,直到滿意嘅顏色。
2. 將混合好嘅唇膏用鐵匙羹裝起,放喺火上面加熱至溶化。
3. 最後將啲唇膏液倒入盒仔/唇膏管入面,冷卻之後就用得。

 

有色潤唇膏

同整新唇膏一樣,不過配搭嘅唔係另一隻色嘅唇膏而係潤唇膏,顏色濃淡自己話事,素顏嗰陣時用就一流~

材料
舊唇膏
潤唇膏
凡士林

用具
碗仔
搞拌捧
滖水水(加熱)

做法
1. 舊唇膏、潤唇膏同凡士林挖出嚟放喺碗入面。
2. 將碗放入煲內隔水加熱,溶化所有材料並搞拌混合。
3. 最後將啲唇膏液倒入盒仔/唇膏管入面,冷卻後就用得。

All Photos from Internet and Youtube Screen Shots