點解男友好忙都有時間打機!「蜘蛛俠」&「FIFA 19」&「NBA 2K19」接力激嬲女友

相信有個波迷男友嘅女友喺前幾個月嘅世界盃期間都過得好苦,幾經辛苦捱咗一個月幾乎晩晩都搵唔到男友嘅日子,以為呢場「足球VS女友」嘅戰爭終於結束可以黐返實男友之際,兩個月後就有新嘅對手出現,仲要唔只一個,而係連續三個......

先有9月頭嘅「Spider-Man」同「NBA2K19」,到男友打爆嗰兩隻嘅時候FINAL BOSS「FIFA19」就喺早幾日出現!!!計計下前後又要過個幾兩個月畀男朋友冷待嘅日子,真係心很累啊😢

1. 扮攰唔陪我

「今日好攰想早啲瞓,唔送你返去啦」作為識做嘅女友,聽到男友咁講就梗係唔會逼佢陪自己返屋企,放佢走等佢可以早啲休息啦。點知之後問佢「點啊你,準備瞓未啊?」,佢竟然話打緊機?!乜你唔係話攰想早啲返去瞓嘅咩... 點解要用攰做藉口使開我😢

2. Hea覆Hea應

男仔Multitasking嘅能力天生就比女仔弱,所以當佢哋好專心咁打機嘅時候,根本就冇能力留心去聽/去睇女友畀佢哋嘅message,有啲更加連睇都唔睇就直接打「OK」、「haha」、「😮」、「?」呢類型嘅答案Hea覆,睇到真係好激氣,覺得係咪有機打就冇我?!!!!

3. 完全冇咗影

男友鍾意打機娛樂放鬆心情,做女朋友會理解,但可唔可以都畀返少少時間,打完一舖覆一次Message?打到不見天日,跌咗落黑洞咁,至少都報個到畀我知你係打緊機定做緊其他嘢啊🙄

不過姊妹們要記住,遇到呢啲情況發脾氣係冇用der〜男友只會覺得你好煩阻住晒,所以不如用啲小技巧去拆,顯得自己聰明又可愛啲啊😛

1.自己都搵啲興趣畀空間大家

每個人都有自己鍾意做嘅嘢,男友鍾意打機,女友鐘意煲劇,咁不如兩個人喺同一空間做各自鍾意做嘅嘢啦〜比起係咁搵嘢掉男友、係個Mon前面行嚟行去阻住佢吸引佢注意,畀空間佢休息下、舒緩下壓力仲得人鍾意!

2. 陪佢打仲要打得勁過佢

既然男友可以陪女友打機,咁女友都可以陪男友打機姐!一嚟同佢打機可以感受下有咩咁好玩,二嚟又可以等佢陪住自己,仲可以知佢做緊咩唔使心掛,一舉多得〜〜如果女友肯陪自己打機,仲唔亂發脾氣,男友一定會覺得女友超抵錫,加爆分!如果可以,要打得勁過男友,等佢要你教返你轉頭😛

3. 坐低傾掂佢

如果真係忍唔到,就清清楚楚咁同男友講自己嘅諗法,大家傾下可以點樣互相遷就同包容,例如幾時係女友專屬時間我,男友又可以打機幾耐先覆message一次咁,傾個大家都接受嘅方案,咁就大家都happy啦😙