[LIFE]「Ruby Close」原來返咗嚟!4個消失又復活嘅Youtuber你仲記唔記得?

編輯一冇嘢做就好鍾意睇Youtube,睇住啲Youtuber一代接一代咁轉換,就覺得自己老啦。有啲Youtuber例如Eminleo、Gagmode咁消失咗就冇再出現,但有幾個就就東山再起出返嚟拍片,你又記唔記得佢哋?

Ruby

「Ruby Close!」相信一班8、90後都唔陌生,個個都應該有扮過Ruby喺片尾個觀眾講byebye,畀心再用手摭鏡頭嘅手勢🤣 可以話係香港初代Youtuber嘅Ruby當年因為畀班網民笑抵受唔住壓力而喺Youtube消失,後嚟去咗瑞士讀書。2014年返香港都有喺幕面現過身,到2015年先正式做返Youtuber〜

Ricko Lam

Ricko之前因為被爆「疑似呃蝦條」而神隱,但事後用咗四個月嘅時間似乎已經反省完,維持佢一貫嘅浮誇風格,重出江湖再拍片。佢試過輕輕咁抽自己水,拍條片教人點面對壓力,仲有拍下啲VLOG,又或者係同其他Youtuber合作下咁〜

劉馬車

「天水圍陳浩南」最令人印象深刻嘅一定係「食屎狗!!!!」嗰條片,以前劉馬車喺片入面通常情緒都係比較興奮同激動,令一班花生友笑到「gap gap」聲,後嚟畀大陸拉去坐監之後就冇晒消息。不過就喺上星期劉馬車就傳出消息,佢upload咗條片上Youtube,同大家講,佢,終於都返嚟啦。依家嘅劉馬車明顯平穩咗,但有網民就話唔信佢變咗,因為已經見過佢正常之後又故態復萌😂

龍心

龍心嘅登場實在係經典中嘅經典,最近龍心因為搵到佢永恆嘅真愛而俾班巴打拎返出嚟講。原來龍心喺出獄後近呢幾年都有喺Youtube upload啲片同一班花生友分享佢嘅生活,之前仲接受過媒過訪問,講下自己嘅近況同大眾對自己形象嘅睇法添!