[LIFE] 你嘅秘密值幾錢?日本流動「秘密屋」專收集秘密製作「秘密石頭」!

你願意用幾多錢去買人哋嘅秘密?日本藝術家Ribeka Kimura(木村りべか)不定期咁拉住佢嘅「秘密屋」( ひみつ屋)喺東京唔同地方收集各人嘅秘密,再製作成「秘密石頭」賣畀想知道其他人秘密嘅人。

想同陌生人分享自己秘密嘅人可以喺Ribeka嘅「秘密屋」入面用紙仔寫低秘密,然後將紙仔放入水泥,由秘密提供者整成自己鍾意嘅石頭形狀,再為自己嘅「秘密石頭」標價。Ribeka都會大概問下秘密嘅內容等想買「秘密石頭」嘅人可以參考下先買,但實際具體嘅秘密內容就只有提供者先會知道啦〜

「秘密石頭」可以喺Ribeka嘅「秘密屋」買到,亦可以喺佢星期六嘅「秘密商店」買得到。到依加為止佢收集咗超過100舊秘密石頭,價格由0円到5000兆円都有,Ribeka就話大約500円嘅石頭最多人買,通常都係因為覺得個概念好得意、有趣而買。(好想知係咩秘密值5000兆円!不過冇咁多錢買🤷🏻‍♀️)

睇返Ribeka個人網站同Twitter,「秘密石頭」嘅活動暫時只係公布到11月3號,之後會唔會再有就清楚。睇嚟想整/買返舊「秘密石頭」嘅朋友要快手,或者留意住佢嘅行程公布啦!唔知你哋嘅秘密又值幾多錢呢?〜

除咗「秘密石頭」之外,Ribeka亦有自己嘅插畫公仔Nekonin,係一隻用極簡單嘅線條畫成嘅貓忍者,童趣滿分!除咗推出LINE Sticker之外,遲啲12月仲會有佢嘅GIF動畫展,有興趣就去Ribeka個人網站睇下啦〜

All Photos from Internet and Twitter