[LIFE] 浪漫海島風+瘋狂打卡!5間中韓台超美異國風Cafe

放假就好想好relax咁吹下海風,再飲杯咖啡咁休閒咁過,如果每個假期都可以去峇里、馬爾代夫呢啲渡假勝地放鬆下就好啦~可惜嘅係邊有咁多假同時間飛咁多個鐘去咁遠啊,不過好彩近近地喺中、韓、台都有地方好似去咗好遠嘅海島渡假咁可以頂住癮先,去影下相扮下嘢都已經好心滿意足㗎啦!嘻嘻🙈

Drunk cafe 爛醉咖啡

只要搭一個鐘飛機,就可以去到美國加洲感受熱帶風情?絕對可以〜台北呢間Cafe雖然已經開咗幾個月,但依然有好多人keep住去影靚相呃like!喺大型半圓帳幕入面加上熱帶植物同民族風嘅布置,就好似去咗要搭10幾個鐘飛機先到到嘅美國咁。

最佳呃like位一定係圓形沙池!感覺就好似喺美國去Road Trip咁,舖毛氈同cushion喺地下,再同朋友起個火取暖,飲下熱朱古力,拎住個結他唱下歌嗰種感覺。當然户外區嘅草地都唔可以錯過,不過就要天氣好好先影到靚相,所以記得要揀啱日子!

室內部分就會有啲party room嘅feel,周圍都色彩繽紛,天花板仲有小燈飾,營造星空嘅效果〜

食物同飲品都有唔少選擇,6點前只有小食同飲品可以order,聽講薯條炸得好出色係必食🤤

地址:台北市大安區光復南路116巷9號(捷運國父紀念館站1號出口)
營業時間:咖啡館 11:00-17:30;餐酒館 17:30-00:00
Facebook:Drunk cafe 爛醉咖啡

Villa Sugar

台北都有淺水灣!三芝呢間峇里島風情嘅Cafe令人有種置身海島嘅感覺,超relax啊😚

Cafe設計到好似峇里Resort嘅餐廳咁,外面就係一望無際嘅大海,只要畀少少技巧避過側邊其他建築物咁影相,絕對可以呃到人話自己去咗峇里渡假!

室內都用唔少木嘅設計營造海島風情,加上簡約嘅設計令人覺得更加休閒,喺度過一個下晝一定無問題。

地址:新北市三芝區土地公坑54-16號
營業時間:11:00-21:00
Facebook:Villa Sugar

The Summer

有冇諗過喺Cafe入面會有泳池?The Summer就將泰國Resort嘅設計搬咗嚟做Cafe,用玻璃做天花嘅溫室外型令天然陽光可以打入室內,營造「偽室外」嘅空間,等客人可以有置身異地渡假嘅錯覺。(大家唔好諗住落水唔游得水㗎)

食物除咗有咖啡之外,當然唔少得啲泰國小食例如春卷、咖哩等等。亦都有好精緻嘅Afternoon Tea Set可以食,慢慢歎住等食晚餐😛

值得一提嘅係呢間泰國Resort Cafe其實係由傳統韓屋改建而成,仔細咁睇充滿Fusion嘅味,夠晒特別唔怪得咁多人都去影靚相post IG啊〜

地址:首爾鐘路區敦化門路11 Na街 31-9(서울 종로구 돈화문로11나길 31-9)
營業時間:12:00-01:00

&other

韓國仲有另一間Cafe都有「泳池」,不過就小型好多,只係一個水池仔,但環境同氣氛都同樣好relax㗎!

最得意係冬天嘅時候老闆會將水池用木板蓋住,再喺上面「起冰屋」〜雖然只係一個細細嘅透明帳幕,但入面有提供毛氈同地顫就好似屋企咁,所以感覺幾溫馨㗎!而且到春天Cafe側邊仲會開櫻花,飲啖暖粒粒嘅咖啡再望下啲櫻花,夠晒浪漫。

室內嘅設計就同一般韓式Cafe相約,都係簡單、柔和嘅風格。

佢哋嘅芝士蛋糕好吸引!不過最啱打卡嘅都係嗰杯藍色漸層特飲啊,好似富士山🗻

地址:首爾城東區聖水洞1街 668-104(서울시 성동구 성수동1가 668-104번지)
營業時間:10:00-23:00
Instagram:cafe_n_other

IH CAFE & Bar

如果嫌台灣同韓國都係太遠,深圳夠近啦掛?〜IH CAFE最新分店6月先啱啱開幕,全店以摩洛哥為主題,只要着套靚衫再加少少調色技巧,就可以好似真係飛咗去摩洛哥咁,超有feel啊!

除咗泳池位之外,室內都有唔少靚位影相,編輯就唔講咁多等你自己去發掘下啦〜

睇評價大家就話食物都係一般,不過唔緊要,因為只要好睇打卡一流就OK啦😎

地址:深圳市福田區梅林街道凱豐路28號富國工業區1棟1樓(地鐵上梅林A出口)
營業時間:10:00-00:30

 All Photos from Internet and Instagram