[LIFE] 揮別青春!以下6個行為證明你已踏入「初老」行列!

有無發現隨著年紀越來越大,好多時都會「想當年」,約親朋友出嚟都會一齊懷念以前讀書嘅時光,講返以前點點點,生活習慣亦慢慢改變,唔再任意妄為反而會注重健康,咁代表我地心態上可能已經唔再年輕🤫 如果大家發現自己有以下呢幾種行為,恭喜你,你已經長大成人變成一個真正嘅「大人」啦!不過亦代表你已經青春不再開始老啦……

12點就開始眼瞓

學生時代晚晚煲劇煲到45點,第朝再7點起身返學都完全無問題,瞓幾個鐘已經頂到全日,同朋友出去玩,唱通宵k都係基本,大時大節都一定玩到23點。但而家唔知點解夜晚一到差不多12點已經開始眼瞓,頂盡1點就得返半對眼,出去同朋友聚會都唔會太晏走,除咗因爲眼瞓之外,重點係知道聽日要返工要早起都無心情玩太夜。年紀大了唔可以再任性,要知道睡眠對身體嘅重要性,每晚都捱夜會影響器官排毒,加上有時想唔認老都唔得,因為捱完一晚夜要瞓返3日先補得返……

遠離「凍飲」

夏日炎炎一定要「gur」返杯凍冰冰嘅可樂或凍檸茶先夠爽,就算去starbucks都會叫星冰樂,每日一杯手搖飲品係必須的。但人越大身邊嘅人開始注重養生,「凍飲傷身」呢個概念終於有殺到埋身嘅感覺,所以自動自覺盡量少飲凍野同少食生冷野,怕影響身體同子宮健康。當我地有呢個諗法時,代表已經會開始注重自己飲食,唔再任意妄為,因為知道食咗落肚係要還㗎!

認識的明星都已成家立室

慢慢會發現,那些年喜歡過、追過嘅藝人,由當天嘅年輕小子女子變成爸爸媽媽,睇住佢地從小出道,再談戀愛,結婚生兒。而新出道嘅藝人竟然全係95後,甚至係00後!全部都細過自己,真係想唔認老都唔得啦!

重質不重量

在物質上,開始不只盲目地見到有優惠就唔理有無用都買咗先,而係諗下有無實際需要先買。以前可能會見到平就買買買,搞到屋企勁多唔等洗嘅野,但而家反而會著重產品質素,真係有用先買,而且唔會再貪平,而係希望買到一樣有質素又耐用嘅產品。朋友亦然,唔會再不斷去識新朋友,擴闊自己社交圈子,而係好好珍惜多年以後仲留喺自己身邊嘅朋友,因為朋友都一樣,重質不重量,朋友不用多,真心相待嘅知己幾個已很足夠。

不再依賴社交媒體

以前去每一個地方都會想打打卡,影靚相post上社交媒體呃like,但而家會比較注重自己當下嘅享受,去旅行唔會再趕行程,而且想比自己放鬆,享受當下嘅美好,唔會再為咗一張相就晨早起身化行妝去影個影日出,而係會瞓到自然醒再素顏去嘆個brunch

愛上獨處

以前中意一班人嘻嘻哈哈玩一晚,但人大咗反而更加珍惜自己獨處嘅時間,無特別做啲咩,而係靜靜地放空一下,發下呆比個腦休息。可能生活同工作上有太多事情要處理,跟本沒時間好好思考,無錯約朋友出嚟係可以傾下計減壓,但始終只有自己獨處嘅時候先可以真正釋放自己嘅情緒,一首音樂、一杯熱茶、一個瞓到自然醒嘅早上已經係最好嘅假日活動。