[KOREA] 想靠《真理啇店》幫前f(x)雪莉洗底?大家無法重新接受Sulli嘅5大原因

「SM小公主」Sulli最近以個人綜藝《真理商店》重現觀眾眼前,對上一前嘅螢幕演出已經係上年6月同金秀賢合演嘅《Real》,當時喺電影Showcase上仲畀大前輩成東日暗串佢因為揀衫而遲到,睇嚟唔止大眾對佢「非好感」,似乎係連工作態度都令同行好不滿......

就算全世界對佢嘅負評遠遠多過正評,公司SM仍然將Sulli捧喺手心,合約到期都繼續同佢續約,仲為咗佢製作一套個人綜藝節目希望為佢洗底,依家播咗一集已經成功製造話題,只不過都係對Sulli一面倒嘅批評,睇嚟SM想推幫Sulli翻身真係要再花多大量心機同時間先至有機會成功。究竟係咩原因令時間都沖唔淡一切,大眾一直都冇辦法重新接受Sulli?

覺得偶像身分「係件唔啱自己嘅衫」

就喺洗底個人綜藝《真理商店》第一集Sulli同經理人喺餐廳傾計,講下自己成為藝人之後嘅心路歷程。雖然冇明確咁提到f(x),但就話以前自己太細個就入行,「人哋叫我做咩我就做咩,其實唔明白點解要咁做」,到大個突然醒覺問自己「其實我咁做係為咗啲咩?」、「點解我要做嗰啲嘢?」,就覺得「自己同嗰件衫並唔相襯」。

呢段說話就引嚟成班網民圍插,覺得Sulli個人好自私只係睇到自己痛苦嘅地方,而完全漠視咗自己嘅行為帶畀身邊人嘅傷害,將自己包裝成悲劇嘅主角、唯一嘅受害者。節目入面Sulli就好似想推翻以前做偶像嘅一切,覺得行過「偶像」呢條路係做錯,但就冇諗過其實如果當初佢冇加入f(x)做偶像,佢今日可能只係個nobody,否定組合帶畀佢嘅名同利令觀眾睇唔過眼。

Source: 韓星網
Source:韓星網
Source:韓星網

之前仲有Sulli仲有喺IG post過一段預告係佢話自己「討厭Sulli呢個名」,細個如果屋企人同朋友叫佢Sulli佢覺得唔開心,唔知依加又係點呢?

p.s. 編輯覺得條預告剪得有啲取巧嘅,究竟Sulli係唔係咁討厭「Sulli」真係要睇到嗰集先知。(戴頭盔〜〜〜〜)

 戀愛>>>>>任何事情

2014年Sulli因為Dynamic Duo嘅崔子跌咗銀包而被爆兩人熱戀,身受大眾嘅惡評而暫停所有演藝活動,到2015年退出f(x)。戀情曝光後Sulli不時都喺IG放閃,同全世界分享佢嘅幸福,工作放埋一邊。Sulli並冇為佢隱瞞戀情嘅事件向Fans道歉,只係不負責任咁選擇退團了事,令f(x)受到嚴重打擊。因為佢拖累團隊後一走了之,仲要退團後一句關於f(x)嘅說話都冇提過,好似從佢從來都唔屬於f(x)咁,唔少Fans都對佢傷心失望啊。

兩年後Sulli疑似一腳踏兩船同崔子分手,火速同新對象金民俊公開戀愛,不過拍咗四個月就因為性格差異同外界壓力而宣布分手。Sulli認愛嗰時崔子仲喺IG upload咗張「燒羊脾」(양다리)嘅相,暗示Sulli一腳踏兩船(양다리),令Sulli嘅形象再受打擊。

退團後行為脫軌

Sulli退團後IG就經常post各種性感或性意味重嘅相,同佢本來清純可愛嘅形象背道而馳!唔只大眾都接受唔到Sulli摧毀以往建立嘅形象,Fans嘅內心世界更係崩潰,因為Sulli喺佢哋心目中都係單純、天真無邪,但原來嗰一切都係由公司堆砌出嚟嘅假象,全部都只不過係包裝。

着低胸背心、性感泳衣已經係小兒科,Sulli之前仲會經常post啲冇着Bra嘅「激凸」相上IG,就算不停畀網民攻擊都繼續堅持做自己,唔太理會大眾嘅目光,繼續唔着Bra開live、直播自己食忌廉等等,令人懷疑佢嘅精神狀態失常。「失常」嘅行為令人覺得Sulli淫亂、生活唔檢點,表面開放實際保守嘅韓國民眾又點會咁輕易接受返佢啊?〜

都係清純嘅Sulli順眼啲......

以專心演戲為由退出f(x)但作品寥寥可數

Sulli以集中演員活動退出f(x)後嘅,兩年時間內並冇接拍任何戲劇,演藝活動就只冇影Poster、雜誌封面同以嘉賓身分出席活動,連綜藝節目都冇上過一次,得閒就拍拖同post下IG,令人覺得佢言行不一,質疑佢係唔係已經放棄做演員,只係想利用佢剩餘嘅名氣去賺錢。

直到2017年終於有電影作品《Real》,雖然有突破性嘅全祼演出,演技亦受到肯定,可惜以往嘅「脫軌行為」已經令佢形象受損得唔到觀眾支持,票房慘淡成為「票房毒藥」。喺《Real》之後到依家Sulli都未有任何新作品,唔知係啲導演監製唔敢用佢,定係佢真係冇畀心機去Casting呢?

團體活動時表現唔專業

雖然已經係過咗去好耐,但f(x)時期嘅Sulli唔止一次畀網民發現佢表演嘅時候偷懶,跳舞動作做唔足之餘表情亦都散漫,唔係專業偶像應有嘅表現而令歡眾覺得佢唔敬業。睇晒咁多個成員嘅表現,Sulli嘅表演的確比其他成員做得遜色一啲,好多時候都係望住地下而唔係觀眾或者鏡頭,畀人感覺好Hea。

唔知佢「偷懶」嘅時侯個腦係唔係就諗緊點解自己要做呢啲嘢呢?唔理佢諗緊乜甚至其實佢根本冇諗緊啲咩都好,作為專業嘅歌手偶像好應該尊重自己嘅事業,盡全力做好每一次表演而唔係帶過就算,有好多人夢想又有實力踏上舞台而又做唔到,所以有機會就應該好好珍惜,唔係Hea住交貨就算!

All Photos from Internet, Instagram and Video Screen Shots