[LIFE] 香港手信點止得奇華咁悶!原來外國人必買嘅禮物係⋯⋯

奇華「香港終於有手信!」呢句大家都一定記得,但唔知點解編輯硬係覺得呢句Slogan其實係Sell返我哋香港人,想利用本地人把口傳畀外國人,將自己打造成香港手信No.1咁🤷🏻‍♀️ 你哋有冇諗過除咗奇華,仲會介紹啲咩畀外國朋友做手信?但其實好似都唔洗點介紹因為佢哋仲識買過我哋🤦🏻‍♀️

食物類

麻辣鮮露

日本漫畫家Yukari Takinami食完家樂牌嘅麻辣鮮露後畫咗一篇漫畫向讀者介紹有幾好食,然後就掀起咗日本人買麻辣鮮露做手信嘅熱潮!講真編輯自己未食過麻辣鮮露,但日本人就覺得只要食物加咗佢就會變得「好有中國味道」。

因為喺日本完全冇得賣嘅關系,日本人嚟到都會買支返去看門口或者送畀朋友,唔洗出門口都可以感受到「中華風味」〜〜〜

出前一丁

連日本人嚟香港都要買日本傳過嚟嘅出前一丁?因為香港嘅出前一丁有太多種日本冇嘅口味,所以日本人嚟到香港都會買返幾包返去食,特別係香港獨有嘅辛辣XO醬海鮮味。當然即食麵上癮嘅韓國朋友都唔會錯過呢隻最多香港人食嘅公仔麵啦〜

維他檸檬茶

香港名產又點少得本地品牌維他檸檬茶,微澀加上酸甜嘅味道日韓朋友都超like!近期維他檸檬茶仲殺出香港可以喺韓國買到,就知道韓國人有幾愛維他檸檬茶。

菲律賓人都推薦啊!

Lipton奶茶

韓國同日本都有Lipton奶茶,但茶味唔及香港嘅香濃,味道又唔及香港多,所以香港嘅Lipton奶茶沖劑就成為咗日韓朋友嘅必買手信!

車仔茶包

韓國人鍾意買車仔茶包主要係貪佢多平,十幾蚊港紙就有成25個茶包,真係好扺呢〜〜

黑白淡奶

鍾意飲嘢嘅韓國人會將港式奶茶嘅靈魂「黑白淡奶」帶返屋企,因為佢哋覺得啲奶茶咖啡只要加咗黑白淡奶,就會變到好有香港風味!

日用類

黑人牙膏

韓國人覺得黑人牙膏嘅美白效果非常好,所以去親邊度只要有黑人牙膏都會買一推返屋企,當然嚟香港都唔例外啦〜

Tempo紙巾

由於日本人習慣用手巾仔嘅關系,佢哋市面上拎到或者買到嘅紙巾質素都比較低,薄身又易爛。所以鍾意用紙巾嘅日本人嚟到香港就會大手入像,買一大堆返去慢慢用。

其實喺日本上網會搵到代購買香港嘅Tempo紙巾,只係價錢貴到離晒地,叫人點買得落手呢?〜

藥用類

念慈菴潤喉糖

估唔到外國人會咁鍾意念慈菴!潤喉糖受歡迎嘅程度就好似我哋去日本要買龍角散一樣,係必買不能miss嘅手信嚟!!

念慈菴川貝枇杷膏

川貝枇杷膏就係美國人嘅至愛,荷里活男星Matthew Modine話用嚟醫傷風感冒一流。川貝枇杷膏喺美國大約賣US$7一支,但之前被《華爾街日報》「輕輕一推」之後身價曾經爆升10倍要近US$70先買到,不過近排好似回落返啦〜所以唔少美國人嚟香港都會買幾支返去,等病嗰時就拎嚟食,好快就病好。

念慈菴葛根湯

而日本人就鍾意病嘅時侯飲葛根湯,嚟到香港都會買幾包送禮自用,但明明日本都有好多葛根湯沖劑賣點解要喺香港托返日本,唔通真係隔離飯香啲?🤷🏻‍♀️

和興白花油

白花油喺日韓被喻為「萬病通治藥」,因為白花油唔單止可以止頭暈頭痛,仲可以通鼻塞、消除肌肉酸痛。日本人仲發現白花油可以用嚟紓緩花粉症,只要係口罩上滴一滴白花油或者搽喺鼻附近就可以減緩鼻塞、打乞癡等症狀。

白花油仲上埋日本雜誌,喺香港旅遊專題介紹入面被例為「16樣必買手信」之一!

保濟丸

保濟丸應該唔少香港人喺肚痛、腸胃唔舒服嘅時候都有食,但原來唔少韓國人都有食。佢哋仲話保濟丸除咗可以消滯之外仲可以醫頭痛,係家居必備嘅良藥!

曼秀雷敦通鼻爽

韓國人超buy呢支通鼻爽,話係鼻塞人士嘅毒藥,因為只要喺鼻哥㝫附近搽幾下鼻塞好快就通返,好使好用〜

All Photos from Internet and Instagram