[BEAUTY] 食唔哂唔好嘥!可樂+沙律醬洗頭可以令頭髮變柔順兼層次感UP?

食物唔止可以食落肚仲可以用喺身上!英國名模Suki Waterhouse曾經分享過佢嘅美髮小技巧,因為佢覺得自己髮量唔多,頭髮又幼又塌,所以會用可樂洗頭令頭髮變得蓬鬆、更有層次感咁話。外國亦有唔少Beauty Blogger話沙律醬可以當Hair Mask咁用,滋潤頭髮令髮絲更加柔順有光澤,咁就等「實測編輯」又嚟幫大家試試佢啦〜〜

可樂洗頭

材料/用具:可樂、毛巾

倒啊!盡情咁倒落頭髮倒,一邊感覺到啲涼涼地嘅可樂,一邊聞住陣好香嘅可樂味,再一邊聽住啲氣泡沙沙聲,係三重享受(誤)。

用可樂洗濕晒個頭之後就用清水沖乾淨,記得一定要沖到完全乾淨,如果唔係吹乾頭髮之後啲頭髮就會黐埋一pat!!

編輯只係試咗半邊頭髮嘅中至尾段,望落係真係有蓬鬆咗、好似髮量有增加咁!但摸落髮質就有少少嚡,對開叉都冇幫助。

沙律醬護髮

材料/用具:沙律醬、毛巾

用法係好簡單,將啲沙律醬好似髮膜/護髮素咁搽喺頭髮上面,靜置10分鐘後用清水沖乾淨〜

頭髮明顯柔順光滑咗,髮尾都整齊咗,但缺點係沖咗好耐水都仲有殘留嘅沙律醬味......

大家記得一定·一定·一定唔好用有粒粒嘅沙律醬!因為粒粒會卡住喺啲頭髮入面要用梳慢慢梳先甩到(編輯用嗰支屋企珍藏到圍咗期嘅千島醬就係有粒粒),所以記得用乜都冇咁柔滑嗰隻沙律醬!

同埋沙律醬陣味真係好勁,酸到編輯搽完上頭就後悔做實測,放工返屋企用洗頭水洗咗2次頭都仲有沙律醬味🤦🏻‍♀️(或者大家可以揀隻冇咁酸嘅沙律醬可能好啲嘅)