[LIFE] 點解心情差要食朱古力?10種幫你趕走憂鬱嘅「開心食物」!

有時做嘢壓力大、同男朋友嗌交搞到心情唔好,就唔知點解好想食甜嘢,特別係朱古力!原來喺人體缺乏某啲營養元素嘅時候,就會自然想食某類食物,例如身體缺乏氯嘅時候會食薯片、唔夠鈣就會想食芝士咁。如果你覺得心情差,可能就係缺乏下面呢幾種物質,但唔洗怕因為只要食得啱就再以心情UP UP UP!

血清素 (Serotonin)

血清素有助減緩神經活動放鬆心情,當腦內血清素水平低就會令人產生負面情緒,想提升血清素水平可以食啲含有色氨酸、維他命B6同碳水化合物嘅食物去製造血清素,穩定情緒。

安多酚 (Endorphins) & 多巴胺 (Dopamine)

安多酚其實就係腦內嗎啡,同多巴胺一樣由大腦產生嘅化學物質,通常喺做運動嘅時候由大腦製造䆁放,令人有開心、興奮嘅感覺。除咗做運動之外,仲可以食多啲豐富維他命C嘅食物令身體製造安多酚。

苯乙胺 (Phenylethylamine)

拍拖嗰陣大腦會䆁放大量苯乙胺,令人心情愉快,而苯乙胺都可以靠食嘅途徑吸取,最具代表性嘅食物就係朱古力啦〜〜

提子

提子原來都含有唔少維他命C,有助減緩腦部壓力。紅提同黑提仲有多酚可以抗氧化同保護心臟,但果糖含量高唔適易食太多。

大家都知橙含有豐富嘅維他命C,可以幫身體製造安多酚。

香蕉

香蕉含有嘅鉀可以幫助人體神經系統運作,而維他命B6就可以安定神經。另外碳水化合物有效刺激胰島素分泌,有助血清素進入腦部進行合成。

朱古力

唔開心要食朱古力唔係亂咁噏而係有根據㗎!朱古力嘅原料可可豆含有令人產生興奮可可鹼同戀愛荷爾蒙苯乙胺 ,所以食完心情好快就會好返,但建議揀可可豆成分較高嘅黑朱古力,比牛奶朱古力同白朱古力更有效。

黃豆製品

豆類製品含大量蛋白質,而蛋白質中嘅酪氨酸可以製作多巴胺,所以心情低落嘅時候不妨飲杯豆漿,甜甜地又可以提升返心情。

堅果

堅果類含色胺酸與鎂、鋅、錳等礦物質,亦有含有維他命B群、維他命E,可抗氧化、安定情緒,但記得唔好因為順手而不停食,因為堅果脂肪含量大部分偏高,例如花生每日最多10粒、夏威夷果仁同杏仁最多5粒。

芝士

芝士唔止係好多人嘅Comfort Food,仲係有根有據嘅「開心食物」!奶製品嘅鈣有色氨酸可以刺激腦部分泌褪黑激素,有助放鬆心情仲可以幫助入睡添。

雞蛋

雞蛋含有蛋白質、鎂、硒、磷、鉀、維他命A、維他命D、維他命E、卵磷脂等,除咗係啱晒小朋友食嘅有營食物之外,仲係形成色胺酸製造血清素嘅必食食物啊!

雞肉

雞肉係含最多蛋白質嘅肉類,揀雞胸食就可以食得開心又唔怕肥啦〜(雖然雞脾係滑啲嘅.....)

三文魚

三文魚有豐富嘅omega-3同維他命B6,有助色氨酸轉化為血清素,幫助腦部正確傳遞訊息,穩定情緒。