[LIFE]《我愛黑澀會》已經係13年前喇!黑澀會美眉原來而家做緊……

「上課囉!」仲記得以前高小初中嘅時期成日都要追《我愛黑澀會》同《模範棒棒堂》,返到學校就同啲同學不停講,為咗自己鍾意嗰個美眉同friend撐到行都試過🤣 事隔十幾年,你仲記得幾多個黑澀會美眉,又知唔知佢哋依加有咩發展呢?〜

吳映潔 (鬼鬼)

搞怪嘅鬼鬼應該係咁多個黑澀會美眉之中,依加喺娛樂圈發展得最好嘅一個!雖然2009年退出黑Girl之後一度冇咗影,但喺2011年以劉子千《唸你》MV女主角爆紅後就開始接拍唔少大陸同台灣嘅電視劇,事業開始一帆風順。

到2013年同2PM成員玉澤演組成「鬼澤夫婦」出演韓國綜藝節目《我們結婚了(世界版)》之後,喺韓國得到唔少觀眾喜愛,2016年仲簽咗韓國經紀公司CJ E&M出碟兼喺韓國出道,期間亦一直接拍大陸電視劇同電影,可以話係事業嘅最高峰時期。

《我們結婚了(世界版)》

2017年同CJ E&M嘅一年合約結束後自組經紀公司,繼續活躍喺台灣、大陸兩地,但主要都係喺大陸發展。近期就喺大陸參加綜藝節目,而就嚟喺香港上嘅《比悲傷更悲傷的故事》鬼鬼都有特別演出,出年仲會擔正台灣偶像劇《月老戀習生》女主角添!

《明星大偵探》
《比悲傷更悲傷的故事》

黃瀞怡 (小)

小薰就係咁多個之中演戲成就最大嘅一個,喺黑Girl名存實亡嘅時間,佢專攻演戲做演員,2013年以《我租了一個情人》入圍第48屆電視金鐘獎最佳女配角,2016年更以電影《只要我長大》獲得第18屆台北電影節嘅最佳新演員,絕對係對佢演技嘅肯定。

依家小薰仍然喺台灣努力拍劇,亦慢慢踏上女一嘅位置,希望佢以後會有更好嘅發展啦!

詹子晴 (丫頭)

相信唔少人都會記得佢嘅雞仔聲同「開開心心、X你老母」,黑Girl冇活動之後佢嘅工作量其實都唔算太多,以節目主持為主,有時客串下劇集咁。不過佢綜藝感好好好識搞氣氛,相信跟住老細吳宗憲都會keep住搵到食。

不過唔好以為丫頭淨係靠娛樂圈job賺錢,佢其實係「不要對我尖叫,日常茶間,」、「無敵肉研所」同「墨子|Mozi」嘅老闆娘嚟!唔少人話做飲食難,但睇嚟有三個品牌嘅丫頭應該係飲食界奇才,賺唔到錢又點會舖頭越開越多,最近仲開到嚟香港添啊〜

周宜霈 (大牙)

黑Girl隊長大牙2015年開始努力拍劇,雖然未有任何獎項同提名,但睇得出佢好心喺演技方面發展。

《金家好媳婦》

郭婕祈 (MeiMei)

以前Baby Fat嘅MeiMei依加係個下巴尖到可以拮死人嘅瓜子面美女,離開黑Girl之後只拍過兩套劇就冇咗影好少再出現喺電視螢幕。最年以Garena聊聊新聲代超級主播身分活動,有時亦會出席美妝events,或者喺Facebook分享一啲打扮心得。

蔡玓彤 (彤彤)

彤彤最近剪咗超短髮,因為佢就嚟要做媽咪啦!退出黑澀會之後彤彤就去咗做兒童節目主持到依加,對咗小朋友咁多年第時到BB出世應該可以輕鬆上手嘅〜咁多年嚟亦有斷斷續續咁參加綜藝節目、舞台戲、電視劇咁,唔知佢產後復出會唔會再有多啲發展,唔淨止用「彤彤姐姐」呢?

黃暐婷 (Apple)

過咗咁多年Apple都仲係咁優雅溫婉啊〜依加經常參與唔同嘅綜藝節目放笑彈,有時亦會擔任節目主持、做訪問等等。

王承嫣 (小蠻)

身型高挑嘅小蠻退出黑Girl後做過一排model,後來轉型做埋演員,最近演出嘅舞台劇偽婚男女仲得到唔少好評添!

張甯兒 (小婕)

小婕同MeiMei一樣都係瘦咗好多,但唔知係唔係妝感問題,最近嘅小婕同以前嘅小婕完全唔似,仲有啲顯老添(可能因為太瘦?)。依加除咗出席唔同品牌events之外會拍下平面廣告做model,亦係Fashion One潮流風嘅主持,介紹台灣最新嘅潮流。

陳斯亞 (糖果)

以第二代黑Girl身分出道,但歌都未出到隻就因為合約期滿退出咗組合,到2013年以Twinko成員再次出道,不過3年後又退出再轉到吳宗憲嘅經紀公司,再組成Trouble Girls組合上節目,經歷幾番風雨到今年終於solo出道有自己嘅歌,離「Jolin接班人」嘅距離又近咗少少。(真係少少咁多......)

之前有次斯亞就去咗睇少女時代Tiffany嘅Fan Meeting覺得好開心,就想同IG Fans分享佢嗰份喜悅就用中文同英文打咗段Caption,點知就畀網民見到佢啲grammar錯晒,就提佢要用咩字先啱咁。一開始佢仲「死雞撐飯蓋」咁話「我覺得幸福不能嗎......」,之後唔知係咪有啲comment過激,令佢嬲到要報警添!依加佢已經改咗用「her voice」同「happy」,但其實依然仲有錯處......

實力唔夠可以練,但腦筋同態度就真係難改變啲......只能同斯亞講聲加油畀心機。

昆凌 (Hannah)

昆凌絕對係最令人羨慕嘅黑澀會美眉,因為佢已經搖身一變做咗天王嫂,仲生咗一女一仔,同周杰倫有個美滿嘅家庭〜2017年生完仔仔後開始接咗唔少電影,向演員路發展。今年亦創立咗自家服裝品牌JENDES,自己做model影相,慳返model錢之餘又可以令更多人知係屬於佢嘅牌子。