[BEAUTY] 畫胭脂要夾面型!女生必學畫胭脂的小臉減齡術

以前細個睇媽咪化妝見佢將啲胭脂隨手掃上面以為好簡單,到依家大個自己化妝先先,原來胭脂唔係隨便掃兩撻粉紅色喺面就得,而係根據面型有唔同形狀、唔同角度、唔同範圍!如果圓面就唔好諗住再喺蘋果肌上面打圈畫,因為只會令你塊面更圓更大......所以如果想要顯面小望落又後生啲,就要學下自己面型應該點搽胭脂啦〜

1. 鵝蛋形

鵝蛋形絕對係女仔心目中最理想、最渴求嘅面型,要打陰影高光都只不過係想後天努力得到鵝蛋面!鵝蛋形面應該係額頭至眉毛、眉毛到鼻底、鼻底到下巴嘅比例為1:1:1,而五官、輪廓都好平均唔會有超突出嘅部分。鵝蛋面嘅女生適合多種胭脂畫法,最平常可以喺鼻翼旁同顴骨位置掃上胭脂

2. 長形

長形面女生顴骨比較窄,令塊面睇落好似馬面咁長。長面女生可以由髮鬢位置向面頰打橫掃,或重點喺顴骨位打圈,製造兩頰向外延展嘅錯覺。切記唔好向上/斜上掃,面會更顯長啊!!

3. 圓形

圓形面就係面仔好肉地,成塊面圓碌碌唔起角,下巴都偏圓挫唔死人。因為面型偏短,所以畫胭脂要由鼻底旁向耳側(甚至太陽穴)斜上掃,有助拉長面型。千祈唔好橫掃或只喺蘋果肌上胭脂,面會顯得更橫更包,而且用啞色胭脂比帶珠光或閃粉嘅更好。

4. 菱形

如果你額頭同下巴都偏窄但顴骨好突出,咁你就係屬於菱形面。菱形面重點要修飾兩舊大顴骨,胭脂應該由顴骨掃到約太陽穴位置,但唔可以用太紅嘅胭脂或者畫得太明顯(重手),如果唔係顴骨會更明顯,修飾唔到仲變更醜。

5. 心形(倒三角形)

心形面額頭寬,但順住落顴骨會收窄、下巴尖尖。有住尖下巴嘅優勢其實心形面嘅女生可以好似鵝蛋面咁畫喺鼻翼旁同顴骨位置,只係再要喺額頭兩邊打多少少陰影就OK。

6. 方形

方面女生因為腮骨低而明顯同下巴短,畀人感覺好Man好硬朗啊〜胭脂畫法同圓面差唔多,由鼻底旁掃到耳側,最好避開顴骨最闊位置,以免焦點落喺顴骨上放大面部缺點。

All Photos from Internet