[LIFE] 冬天你需要一個被竇!好笑爆趣嘅睡袋周圍瞓唔怕凍親!

落咗幾日雨之後天氣又好似凍咗,依加朝早有時都真係唔想離開個溫暖嘅被竇,極想繼續攤喺被入面懶洋洋咁過一日!但係就算可以喺被竇煲劇打機都好,食飯去廁所點都一定要行出被竇,大家話如果可以帶埋張被去廁所會有幾好呢〜呢個時侯我哋需要嘅就係一個可以行動自如嘅睡袋,咁就可以四圍走又keep住warm啦😚

佈景樹睡袋(Link

今年最爆趣睡袋一定係呢個大樹睡袋!唔好以為佢係普通大樹造型,其實佢係小朋友畫劇嘅佈景樹嚟!佈景樹睡袋全長180cm、闊58cm,就算男友好高好大份都着得落唔會吹到冷親〜最過癮嘅係佢仲附送兩棵可以手揸嘅樹仔,十足十分岔嘅細樹枝🤣

這間公司每年嘅睡袋都超搞笑,上年係UFO造型,將拉鏈拉開就會呈現UFO吸地球物品嘅假象。前年嘅炸蝦造型睡袋更令人瘋搶,變身「人型炸蝦」喺屋企走來走去四圍攤嘅畫面實在太有喜感啦!!!!

2017年UFO睡袋
2016年炸蝦睡袋

牛仔褲雙人睡袋(Link

唔好以為睡袋只可以一人一個,其實可以兩個人一齊用!呢個牛仔褲造型睡袋絕對係黐身女友必備,同男友一人一隻褲腳,可以好warm咁一齊行動,例如着住一齊坐喺梳化睇戲、一齊瞓覺咁,如果一個要去廁所又唔想離開個睡袋另一個就要跟埋去場面會超爆笑〜

人體模型睡袋(Link

召喚喜歡Biology嘅朋友!呢個人體模型睡就啱晒你地,可以着住佢暖粒粒咁瞓覺,又可以用佢嚟拋書包講下啲器官同肌肉咁。不過就小心用嚟瞓覺嘅時候會嚇親人,黑媽媽睇唔清楚會以為有條屍瞓咗喺度......

迪士尼系列小梳化/睡袋(Link

如果搞怪系唔啱你,迪士尼可愛風應該係不二之選啦〜卡通人物頭外型嘅坐墊小梳化只要拆開睡袋部分就可以即刻變成望到就已經覺得暖嘅睡袋!匿喺入面攤喺度煲劇絕係冬天最高享受之一〜

星球大戰睡袋(Link

未諗到買咩聖誕禮物畀男友?如果佢鍾意Star Wars嘅話不如就揀呢幾款睡袋啦〜Jumpsuit設計將四肢都好好包住,活動超方便之餘,腳位仲可以拆開着鞋,直接將睡袋着出街(不過香港未凍到咁嘅又)!

海洋生物睡袋(Link

呢年世界各地都被Baby Shark洗腦,跟住潮流今個冬天用返個鯊魚睡袋實冇錯!另外仲有大墨魚同鯨魚睡袋,三款都厚身又軟熟,一定又暖又舒服〜BB版嘅美人魚同海龜睡袋都超可愛,朋友生BB不妨買個送畀佢啊。

All Photos from Internet