[BEAUTY] 故宮首推化妝品即賣斷市!爆紅「國寶同色」唇膏一定要入手!

提起故宮博物院大家都應該只係諗起國寶、古董、展覽咁,又會有邊個會諗到故宮同現代化妝品有關?故宮博物院早幾日就為大眾帶嚟新驚喜,推出咗唔同嘅中國古典風彩妝,唔止包裝有濃厚嘅古代味道,連內在嘅顏色都有經過精心調配到同國寶一樣,想將國寶色唇膏搽上嘴你就要留心啲mark實日子啦〜

pixel ad 300250

 

事源係之前故宮博物院文化創意館(故宮文創)就推出咗自家設計嘅Masking Tape,有手巧嘅妹子就用Masking Tape重新包裝自己嘅唇膏變成「中國古曲風唇膏」,隨後因為太靚嘅關系而爆紅瘋傳。除咗令故宮文創Masking Tape大賣之外,仲令一眾網民跪求故宮推出官方嘅「故宮口紅」,結果呢個眾人嘅夢想就喺今年達成,生產咗由博物院展品得到靈感嘅唇膏,上星期一開賣就火速被搶購一空,全部售罄!

故宮口紅

故宮文創嘅「國寶同色」故宮口紅系列由外靚到外,叫人點忍手唔買?六款唇膏顏色係根據故宮展品嘅顏色調製,全部色調都如古代皇后妃嬪知性得體,真係好難只揀一支帶返屋企啊!編輯覺得豆沙紅同楓葉紅都好啱日常返工用,係MLBB系顔色喔〜

比顏色更吸引嘅係唇膏管嘅設計!參考後宮佳麗服飾嘅圖案之餘,亦以凹凸紋理去呈現刺鏽嘅質感,整個系列嘅構思超有心思成品都好細緻呢。

故宮彩妝

故宮彩妝就係由故宮淘寶而唔係故宮文創生產,所以推出嘅時候就令人搞唔清楚,雖然兩邊推出嘅產品完全冇關係,但確實都係由故宮旗下嘅公司生産,同屬故宮出品,冇話邊個正版邊個翻版。

故宮仙鶴系列

故宮仙鶴系列以「紅漆邊架緞地繡山水松鶴圍屏」為靈感來源,用溫䁔嘅大地色系眼影同2019 Pantone顏色「活珊瑚橘」色胭脂,營造大自然嘅氣息。

故宮螺鈿系列

而故宮螺鈿系列的靈感則來自「黑漆嵌螺鈿花鳥羅漢床」,除咗外殼同展品一樣華麗之外,四色眼影亦以珠光質感呈現羅漢床上螺鈿嘅閃閃生輝。

故宮點翠眼影 & 故宮高光

點翠眼影外殼嘅設計好有中國嘅特色,但係老實講眼影隻淡藍色就有啲難用啦。

故宮美人面膜

除咗化妝品之外故宮亦推出咗兩款面膜,等大家可以由內開始變到同故宮美人一樣咁靚〜

可惜嘅係故宮化妝品一開賣就被瘋狂搶空,要到下年春天先會重新上架。故宮口紅目前可以喺網上預購,但故宮彩妝就只可以等佢補貨先有得買,有興趣記得要check住故宮博物院官方淘寶店,等佢一重新上架就落單啊!

All Photos from Internet