[BEAUTY] 2019年一定要識嘅美妝Blogger:Man爆唇膏達人「東北蕾哈娜」!

Beauty Blogger通常都係又白又滑嘅靚女,睇佢哋搽唔同色嘅唇膏都超靚,搞到自己一時失去理智跣手跟住買,結果啲色原來唔啱皮膚黑中帶黃嘅自己用,傷荷包又傷心啊〜如果同編輯一樣唔係白滑美女嘅話,呢個爆紅嘅美妝Blogger「東北蕾哈娜」應該幫到你手揀唇膏!

pixel ad 300250

東北蕾哈娜

呢個Man爆嘅哥仔「東北蕾哈娜」憑住又黑又黃嘅膚色為一眾皮膚冇范冰冰咁白、冇Angelababy咁滑嘅女仔,將大小品牌嘅各色唇膏試上嘴,喺小紅書上同網友分享。

成為唇膏達人短短兩個月,就已經吸引咗六萬七千個Followers,都係全靠佢啲相張張都冇P圖、冇Filter,完完全全咁將最真實嘅面貌同顏色呈現喺各位眼前啊〜佢特登嘟超個嘴但眼神又極平和嘅反差真係超爆笑😂

東北蕾哈娜

東北蕾哈娜

唔好以為全部男人都分唔到啲唇膏係咩色!「東北蕾哈娜」唔單止輕鬆咁分辨到邊支唇膏紅、邊支粉、邊支偏啡偏紫,亦會有「厚塗」、「薄塗」等唔同效果,佢仲會喺質感、包裝方面入手,仔細咁評價每支佢試過嘅唇膏,唔會因為係貴嘅大牌而一味只齋講好嘢,平嘅就話唔品質差,好用就讚,唔好用就彈,都真係幾專業㗎〜

東北蕾哈娜
「中毒色」都冇有怕照試,有齊厚薄兩種效果參考。
東北蕾哈娜
生得黑果然唔啱用粉紅系,放棄吧姊妹們。
東北蕾哈娜
佢仲比較過M.A.C兩支大熱色Chili同Devoted to Chili添!
東北蕾哈娜
評價都真係寫得幾仔細㗎〜
東北蕾哈娜
為咗畀大家睇下上嘴同唇膏有冇色差,連埋鬚根一齊Close Up絕對冇問題。

有時佢會搵埋女朋友一齊試色上手,除咗畀一班黑妹參考之外,都唔會忽略啲白雪公主嘅,一次過畀人睇晒兩種效果。

東北蕾哈娜

東北蕾哈娜

雖然「東北蕾哈娜」嘅試色確實係真實感滿分,但係好似都係自己去門市試下畫下開心啲又準確啲啫!參考完就快啲去試下心頭好再將佢哋帶返屋企啦😝

Photos from 小紅書 — 東北蕾哈娜